ბორჯომის ბაზარმა მუშაობა განაახლა

ბოლო ერთი თვის განმავლობაში, ნახანძრალი შენობის სარეაბილიტაციო სამუშაოები მიმდინარეობდა. შეიცვალა დამწვარი ჭერი, დახლები, ფანჯრები და კარებები. დირექტორის გია მელიქიძის თქმით, ბაზრის ადმინისტრაციამ ამისთვის ბანკიდან 25 000 ლარის სესხი აიღო.

მოვაჭრეები საკუთარ ადგილებს გუშინ, 23 ივლისს დაუბრუნდნენ.

„ეს ერთი ბაზარი აქვს ქალაქს ხომ არ დავკეტავდით?! წინააღმდეგ შემთხვევაში მოვაჭრეების სახლში გაშვება მოგვიწევდა“,–ამბობს გია მელიქიძე.

მიუხედავად იმისა, რომ ბაზარში მუშაობა განახლდა დახლების ნაწილი მაინც ცარიელია. დირექტორი ამბობს, რომ ყოველთვის ასე იყო, რადგან მოვაჭრეებს შენობაში შესვლა არ სურთ და გარევაჭრობა ურჩევნიათ.

შეგახსენებთ, რომ ბორჯომის ბაზარის პირველ სართულზე ხანძარი მიმდინარე წლის ექვს ივნისს, გამთენისას გაჩნდა. დაახლოებით 500 კვადრატულ მეტრზე მოვაჭრეებს სურსათი და ტანსაცმელი დაეწვათ. ბაზრის დირექტორის ინფორმაციით ხანძრისაგან მიყენებულმა ზარალმა 65 000 ლარს მიაღწია.

ბოლო ერთი თვის განმავლობაში, მოვაჭრეების ნაწილი ბაზრის შენობის მეორე სართულზე ყიდდა საკუთარ პროდუქტებს, ნაწილი კი, არასაკმარისი ფართის და ფინანსების არქონის გამო ვერ მუშაობდა.

ხანძრით დაზარალებულ 20 მოვაჭრეს, ბორჯომის მერია 24 350 ლარით დაეხმარა.

ბორჯომის აგრარული ბაზარი 2007 წელს აშენდა და საიჯარო ხელშეკრულებით შპს „საუკუნმშენს“ 2031 წლამდე გადაეცა.

[ლუბა გიორგაძე, ბორჯომი]