მეექვსე დღეა რაც ბორჯომის აგრარული ბაზრის შენობის ნაწილი დაიწვა, თუმცა ჯერ არც ტერიტორია გაწმენდილა და არც აღდგენით სამუშაოები დაწყებულა. აქ ისევ დამწვარი ინვენტარი დგას და ძირზე მინების ნამსხვრევები ყრია.
ხანძარმა ბაზარში ყველა მოვაჭრე აზარალა. მათი ნაწილი, ცეცხლისგან გადარჩენილ ფართში შევიდა, ნაწილი კი იმის გამო, რომ შენობაში საკმარისი ადგილი არაა, ჯერ ისევ სახლში რჩება.
დალი მათიაშვილი ერთ–ერთია იმ 20 მოვაჭრიდან, რომელსაც ხანძარმა სურსათი მთლიანად გაუნადგურა. ის რაც არ დამწვარა სასწორი და მაცივარია, თუმცა, გვერდები ორივეს დამდნარი აქვს: „ათასობით ლარის პროდუქტი მთლიანად გადავყარე, ახლა ვისესხე ფული და ცოტა–ცოტა რაღაცეები ვიყიდე, რომ სახლში ორი კაპიკი შევიტანო. იმედია, იმდენს მაინც ამოვიღებ, რომ ვალი დავფარო“.
აგრარული ბაზრის ტერიტორიაზე, დაახლოებით 20 კვადრატულ მეტრ ფართში, ათამდე მოვაჭრე ზის. ადგილობრივები სურსათს, ბოსტნეულს, სუნელებსა და რძის პროდუქტებს ყიდიან.
„დევნილი ვარ, სახლ–კარი დავკარგე და იმდენი არ მინერვიულია როგორც ახლა. საერთოდ ვერაფერი გადავარჩინე, რაც დაიწვა დაიწვა, დანარჩენი წყლისგან გაფუჭდა, ცეცხლს რომ აქრობდნენ. ახალა ნისიად მაქვს აღებული პროდუქტი და იმით ვვაჭრობ. ჩემი ოჯახის შემოსავალი მხოლოდ ეს არის და სხვა გზა არ მაქვს“, – ამბობს სუნელების გამყიდველი ნათელა ნოზაძე.
შენობის მეორე სართულზე გასაყიდი ტანსაცმელის ნაწილი ძირზეა გაფენილი, ნაწილი კი სახელდახელოდ გაბმულ თოკებზეა გადაკიდებული. აქ აღარც თაროებია და აღაც საკიდები. მოვაჭრეები ამბობენ, რომ ის რაც არ დაიწვა ახლა იაფად ყიდიან: „ასე ძირს გავშალე, აბა რა ვქნა, უკეთესი პირობები არ არის. ახალ ტანსაცმელს ვერ შემოვიტან ფული არ მაქვს. იქნებ ეს გაიყიდოს“, – ამბობს ერთ–ერთი მოვაჭრე.
მათი უმეტესობა ბაზარში თითქმის 20 წელია მუშაობს. ადგილობრივები ამბობენ, რომ თუ მათ თვითმმართველობა არ დაეხმარა ბაზარი დაიკეტება: „დირექტორი გვეუბნება რომ მერიიდან დახმარება იქნება და ჯერ ჩუმად ვართ, იმედი გვაქვს აგვინაზღაურდება ზარალი“.
ბორჯომის აგრარული ბაზრის დირექტორი გია მელიქიძე ამბობს, რომ ზარალის ოდენობამ 65 000–ლარამდე მიაღწია. მისივე თქმით, იგი მერიის თანამშრომლებს გასულ კვირას ესაუბრა, თუმცა, ამ დრომდე გადაწყვეტილი არ არის, თუ რითი დაეხმარება მერია მოვაჭრეებს.
„ახლა მერიაში იმაზე მიდის მსჯელობა როგორ შეიძლება დაზარალებულების დახმარება. რამდენიმე დღეში გვეცოდინება და გაცნობებთ“, – გვითხრეს ბორჯომის მერიაში.
შეგახსენებთ, რომ ხანძარი ბორჯომის აგრარულ ბაზარში, ექვს ივნისს დილის 05:00 საატზე გაჩნდა. შენობაში ცეცხლი დარაჯმა დაინახა და სახანძრო ჯგუფს გამოუძახა. დირექტორი ვარაუდობს, რომ ხანძარი ელექტროგაყვანილობამ გამოიწვია.
ხანძრის გამომწვევი მიზეზის დადგენა სამართალდამცველებმა უკვე დაიწყეს. შსს–მ საქმეზე ძიება 187–ე მუხლის მორე ნაწილით დაიწყო, რაც ნივთის დაზიანებას, ან განადგურებას გულისხმობს.
ბორჯომის აგრარული ბაზარი 2007 წელს აშენდა და საიჯარო ხელშეკრულებით შპს „საუკუნმშენს“ 2031 წლამდე გადაეცა. როგორც ბაზრის დირექტორი ამბობს, შპს–ს დამფუძნებელი ამჟამად საქართველოში არ იმყოფება.
[ლუბა გიორგაძე, ბორჯომი]