სოფელ ბოლაჯურთან ავარიის შედეგად ოთხი ადამიანი დაშავდა

ავტოსაგზაო შემთხვევა ადიგენში, დაახლოებით, 17:00 საათზე მოხდა. როგორც თვითმხილველები ამბობენ, დაშავებულები ოჯახის წევრები არიან და სოფელ ბოლაჯურში ცხოვრობენ: "ბიჭი მეექვსე, გოგო მერვე კლასელია. როგორც დავინახე მამას და ბიჭს თავზე ჭრილობები ჰქონდათ, თუმცა ორივე გონზე იყო".

სასწრაფო სამედიცინო დახმარების ჯგუფმა ორი დაშავებული ახალციხის რეფერალურ ჰოსპიტალში, ორი კი ადიგენის საავადმყოფოში გადაიყვანა.

როგორც ადიგენის სამედიცინო დაწესებულებაში განმარტავენ კლინიკაში 13 წლის გოგონა და დედა შეიყვანეს, მათ დაჟეჟილობები აღენიშნებათ და გამოკვლევები უტარდებათ.

„მათ სიცოცხლეს საფრთხე არ ემუქრებათ“, – აცხადებენ ადიგენის კლინიკაში.

რაც შეეხება ახალციხის რეფერალურ ჰოსპიტალში გადაყვანილ მამა–შვილს, როგროც სამედიცინო დაწესებულებაშ ამბობენ, ამ დროისთვის ორივე მათგანს ექიმები სინჯავენ.

გამოძიება სისხლის სამართლის კოდექსის 276-ე მუხლის პირველი ნაწილით მიმდინარეობს, რაც ტრანსპორტის მოძრაობის უსაფრთხოების ნორმების დარღვევას გულისხმობს.



[თინათინ ზაზაძე, ადიგენი]