ახალქალაქში საზოგადოებრივი ტუალეტი არ მუშაობს

ახალქალაქის ტუალეტზე და მასთან დაკავშირებულ პრობლემებზე, ახალქალაქის მუნიციპალიტეტის საკრებულო, საკუთარ ფეისბუქ გვერდზე წერს და ფოტოებსაც აქვეყნებს.

როგორც წარმომადგენლობით ორგანოში აცხადებენ, თავმჯდომარე და დეპუტატები თავად იყვნენ გასულები ქალაქის ქუჩებში და ადგილობრივების პრობლემები მოისმინეს.

„საჩივარი და მოთხოვნებია მოხუცებისაგან, რომლებიც დროს ატარებენ ქალაქის ცენტრალურ პარკში, ახალგაზრდებისაგან, რომლებიც თამაშობენ სპორტულ მოედანზე საერთო ტუალეტთან ახლოს და ბავშვების მშობლებისაგან რომლებსაც უწევთ თამაში საბავშვო მოედანზე“, – ნათქვამია საკრებულოს განცხადებაში.

ახალქალაქის მუნიციპალიტეტის საკრებულოს განცხადებაში წერია, რომ საზოგადოებრივი ტუალეტი გახსნის დღიდან არ ფუნქციონირებს და მერიის შესაბამისი სამსახურებისაგან რეაგირებას ითხოვს. მათივე თქმით, მალე „ახალქალაქობის“ დღესასწაული გაიმართება და მანამდე პრობლემა უნდა მოგვარდეს.

ახალქალაქის მუნიციპალიტეტის მერი იური უნანიანი „სამხრეთის კარიბჭესთან“ ამბობს, რომ საზოგადოებრივი ტუალეტი ახალქალაქში ორი წლის წინ გაიხსნა, თუმცა მისთვის გაურკვეველი მიზეზების გამო, აქ ინვენტარი დააზიანეს და სწორედ ამიტომ არ ფუნქციონირებდა.

„ჩავატარებთ ინვენტარიზაციას, ვნახავთ რა არის დაზიანებული, რომ შევცვალოთ, გავარემონტოთ და მერე დაიწყებს ფუნქციონირებას“, – გვეუბნება იური უნანიანი.



[ლუბა გიორგაძე, ახალქალაქი]