ახალციხეში დამოუკიდებლობის დღეს აღნიშნავენ

წვიმიანი ამინდის მიუხედავად, ტრადიციული ზეიმი მძლეოსნების გარბენით გაიხსნა, რომელთაც სტარტი ქალაქის ცენტრიდან, შოთა რუსთაველის ძეგლის მიმდებარე ტერიტორიიდან აიღეს.

შემდეგ ღონისძიების მონაწილეებმა მესხეთის სახელმწიფო დრამატული თეატრის წინ გადაინაცვლეს. აქ პარალელურ რეჟიმში მიმდინარეობს შეჯიბრება მკლავჭიდში, ჭიდაობასა და კრივში.

გარდა ამისა, იმართება სამხატვრო სკოლის მოსწავლეების ნამუშევრების გამოფენა-გაყიდვა.

ამავე სკოლის მოსწავლეები ასფალტსაც ხატავენ. ნახატები ძირითადად მშვიდობის თემაზეა.

14:00 საათზე ახალციხის ცენტრალურ სტადიონზე სკოლის მოსწავლეებს შორის მინი-ფეხბურთის ფინალური მატჩი გაიმართება.

16:00 საათზე კი საქართველოს სპორტისა და ახალგაზრდობის საქმეთა სამინისტროს თასზე ერთმანეთს ორგანიზაცია დაწესებულებების გუნდები შეერკინებიან.

დამოუკიდებლობის დღის აღნიშვნა 18:00 საათზე, მესხეთის სახელმწიფო დრამატული თეატრის დარბაზში, ადგილობრივი ანსამბლების მონაწილეობით გამართული კონცერტით დასრულდება.

ღონისძიებები ახალციხის მუნიციპალიტეტის გამგეობის კულტურის, სპორტისა და ახალგაზრდულ საქმეთა სამსახურის ორგანიზებით ეწყობა. ზეიმისთვის ადგილობრივი ბიუჯეტიდან 300 ლარია გამოყოფილი.







[ნინო ნარიმანიშვილი, ახალციხე]