ახალციხეში სპორტული ღონისძიებები მიმდინარეობს

სპორტული ღონისძიებები 12:00 საათზე გარბენით დაიწყო. გამარჯვებულებს სიგელები და მედლები ახალციხის ციხეზე დასკვნით ღონისძიებაზე გადაეცემათ.

საქართველოს დამოუკიდებლობის დღისადმი მიძღვნილ ღონისძიებას სამოქალაქო განათლების პროგრამა „მომავლის თაობის“ წარმომადგენლებიც შეუერთდნენ და ახალციხის სასპორტო სკოლაში მინი ფეხბურთში გოგონათა ჩემპიონატი ჩაატარეს. გამარჯვება მუსხისა და ფერსის სკოლებმა მოიპოვეს.

ამ დროისთვის ახალციხის ციხეზე შეჯიბრი მკლავჭიდში და ჭიდაობაში მიმდინარეობს. 15:00 საათზე დაიწყება მოტო–შოუ, ასევე, დაგეგმილია საფინალო მატჩი ფეხბურთში, რომელიც ახალციხის ცენტრალურ სტადიონზე გაიმართება.

16:30 საათზე ადგილობრივი ფოლკლორული და ქორეოგრაფიული ანსამბლების კონცერტი დაიწყება.

19:30 საათზე სპორტულ ღონისძიებებში გამარჯვებულებს დააჯილდოვებენ. 19:00 საათზე კი გალა–კონცერტი დაიწყება, ჯემალ სეფიაშვილის, ცისანა სეფიაშვილის, ბორის ბედიას, ბესიკ კალანდაძის, ირმა სოხაძის, ენრიკო ჯანელიძის, ჯგუფ – „თბილისური კვარტეტისა“ და კახაბერი და ხანუმების მონაწილეობით, რომელიც 21:00 საათზე საქართველოს ჰიმნით და ფოიერვერკით დასრულდება.



[ვარლამ წიკლაური, ახალციხე]