მთავარ პროკურატურასთან ხორავას ქუჩის საქმეზე გამოტანილ განაჩენს აპროტესტებენ

აქციაზე მოკლული დავით სარალიძის მამის, ზაზა სარალიძის მხარდასაჭერად შეკრებილები არიან საზოგადოების, არასამთავრობო ორგანიზაციების და პოლიტიკური პარტიების წარმომადგენლები.

სარალიძე ირმწუნება, რომ გამოძიების ეტაპზე დაზიანებულია როგორც მტკიცებულებები, ასევე დანგრეულია ის ავტოფარეხი, სადაც მოხდა მკვლელობა. სარალიძის თქმით, პროკურატურამ კარგად იცის თუ ვინ არის რეალურად დამნაშავე, შესაბამისად, საჭიროა დაუყოვნებლივ მოხდეს როგორც მკვლელობაში მონაწილე პირების, ასევე დანაშაულის დამფარავი პირების დასჯაც: „არავითარი ექსპერტიზა, მათ ძალიან კარგად იციან ვინ არის დამნაშავე და საჭიროა დაისაჯონ დამნაშავეები, ასევე პასუხი აგოს ირაკლი შოთაძემ".

საქართველოს მთავარმა პროკურორმა, ირაკლი შოთაძემ დღეს გამართულ ბრიფინგზე განაცხადა, რომ ყველა ის ექსპერტიზა, რომელიც ხორავას ქუჩაზე მომხდარის საქმეზეა ჩატარებული სამხარაულის ექსპერტიზის ბიუროს მიერ, ჩატარდება ასევე შვეიცარიის საექსპერტო ბიუროშიც.

"დღევანდელმა სასამართლომ დაადასტურა, რომ კითხვები პასუხგაუცემელი რჩება. დღეს სასამართლომ განაჩენი გამოუცხადა პროკურატურის სრულიად არასწორ გამოძიებას. ამ სიტუაციაში მნიშვნელოვანია კონკრეტული პირების პასუხისმგებლობის საკითხი დადგეს ვინც ამ სიტუაციამდე მიიყვანა საქმე. ასევე, საჭიროა სისტემაში გატარდეს რეფორმები“, - განაცხადა აქციაზე პრეზიდენტის საპარლამენტო მდივანმა ანა ნაცვლიშვილმა.

დღეს, 31 მაისს სასამართლომ ერთ-ერთი ბრალდებული დავით სარალიძის მკვლელობის ნაწილში გაამართლა, ხოლო მეორე ბრალდებულს ბრალი გადაუკვალიფიცირა და მკვლელობის მცდელობაში ცნო დამნაშავედ.

ხორავას ქუჩაზე მოზარდების მკვლელობის საქმის ოთხთვიანი სასამართლო განხილვა 30 მაისს დასრულდა. ვინაიდან საქმეში არასრულწლოვნები ფიგურირებენ, არასრულწლოვანთა მართლმსაჯულების კოდექსიდან გამომდინარე, სასამართლო სხდომები დახურული იყო.

[sknews.ge]