სამცხე–ჯავახეთში C ჰეპატიტის და აივ ინფექციის 72 შემთხვევა დაფიქსირდა

ორი თვის განმავლობაში C ჰეპატიტზე გამოკვლევა 979 პაციენტს ჩაუტარდა. დადებითი შემთხვევა 69 პაციენტს დაუდგინდა.

979 პაციენტიდან აივ ინფექციაზე გამოკვლევა 969 პაციენტმა ჩაიტარა, დადებითი შემთხვევა სამ პაციენტს დაუდგინდა.

შეგახსენებთ, რომ სამცხე–ჯავახეთში უფასო სკრინინგი C ჰეპატიტსა და აივ ინფექციაზე 9 ნოემბერს დაიწყო და თებერვლის ბოლომდე გრძელდება.

გამოკვლევების ჩასატარებლად რეგიონის ყველა ქალაქში მობილური ამბულატორიები გადაადგილდება.

„ამ კვირაში ვიყავით ადიგენში და ხვალაც არის დაგეგმილი უფასო სკრინინგი ამ ქალაქში. მომავალ კვირას ბორჯომში მივდივართ“, – ამბობს დაავადებათა კონტროლის და საზოგადოებრივი ჯანმრთელობის ეროვნული ცენტრის, საზოგადოებრივი ჯანდაცვის რეგიონული მართვის დეპარტამენტის სამცხე–ჯავახეთის განყოფილების უფროსი ნინო ზედგინიძე.

უფასო სკრინინგის ჩატარება ნებისმიერ მსურველს ახალციხეშიც შეუძლია. მის: დაავადებათა კონტროლის ეროვნული ცენტრის ახალციხის ლაბორატორია, ახალქალაქის გზატკეცილი; ტელ(+995) 0365 22 51 04;

C ჰეპატიტისა და აივ ინფექციაზე უფასო გამოკვლევების ჩატარება ქვეყნის მასშტაბით ყველა ქალაქშია შესაძლებელი.

[თინათინ ზაზაძე, ახალციხე]