‘განავითარე შენი რეგიონი’–ახალციხეში ბიზნესფორუმი გაიმართა

ახალციხის საჯარო სკოლის მოსწავლეების მონაწილეობით ბიზნესფორუმი დღეს, 27 მაისს სამცხე–ჯავახეთის უნივერსიტეტის სააქტო დარბაზში მოეწყო.

ფორუმში მონაწილეობას, ახალციხის მუნიციპალიტეტის 17 სკოლის ჯგუფი იღებდა. მათ მუნიციპალიტეტში არსებულ პრობლემებზე თავიანთი ხედვები პრეზენტაციის სახით წარმოადგინეს.

მოსწავლეების პრეზენტაციები ძირითადად უპატრონო ძაღლებისათვის თავშესაფრის მოწყობას, ახალციხეში ეკოტურიზმის განვითარებას, არტ–კაფის მოწყობას, ასევე მესხური ოდის შენარჩუნებას და ყველის საწარმოს გახსნას ეხებოდა.

ბიზნესფორუმს ადგილობრივი თვითმმართველობის წარმომადგენლებიც ესწრებოდნენ.

პრეზენტაციებს ჟიური აფასებდა და მათ ფორუმის დასრულების შემდეგ, საუკეთესო ბიზნესიდეების ავტორებიც გამოავლინეს, რომლებიც ახალციხის პირველი და სოფელ ხეოთის საჯარო სკოლის მოსწავლეები გახდნენ. მათი პრეზენტაციები, ქალაქში არტ–კაფის გახსნას და ეკოტურიზმის განვითარებას ეხებოდა.

საუკეთესო ბიზნესიდეების ავტორები, ზაფხულის ლიდერთა სკოლაში უფასო საგზურებით დაჯილდოვდნენ.

დღევანდელი ღონისძიება, პროექტის „განავითარე შენი რეგიონის“ ფარგლებში მოეწყო, რომელსაც საქართველოს სტუდენტური პარლამენტი ახორციელებს. პროექტის მიზანია, ახალგაზრდებში ლიდერების აღმოჩენა და მათში ისეთი სოციალური უნარების განვითარება, რაც მომავალში წარმატების მისაღწევად გამოადგებათ.

„პროექტს გააჩნია განვითარების უდიდესი პოტენციალი. მისი მეშვეობით ჩვენს ქვეყანაში შეიძლება, როგორც ახალგაზრდა თაობის მასიური ჩართვა, მათი ლიდერული უნარების გამოვლენის გზით სახელმწიფო განვითარების პროცესში ჩართვაც“,–ამბობს პროექტის მენეჯერი ახალციხეში ნინო ჩინჩალაძე.

პროექტის სამიზნე ჯგუფები სკოლის მოსწავლეები არიან. ბიზნესფორუმი „განავითარე შენი რეგიონი“ საქართველოს ყველა ქალაქში იმართება.

[sknews.ge]