ბორჯომში გამგებლის მოადგილე დანიშნეს

კალაძე მუშაობას გუშინ, 19 ივნისს შეუდგა. მან აღნიშნულ თანამდებობაზე გიორგი ხომერიკი შეცვალა.

ბორჯომის მუნიციპალიტეტის გამგებლის მოადგილის თანამდებობაზე გამოცხადებულ კონკურსში 17 კანდიდატი მონაწილოებდა. მეორე ეტაპზე მხოლოდ სამი კანდიდატი გადავიდა, 14 ივნისს გამართულ გასაუბრებაზე კი სამი კანდიდატიდან მხოლოდ ორი გამოცხადდა.

რევაზ კალაძე 1988 წლის 21 მარტს ქ. თბილისში დაიბადა. 2004 წელს დაამთავრა თბილისის რაზმაძის სახელობის ფიზიკა-მათემატიკური სკოლა. ამავე წელს ჩაირიცხა სამხატვრო აკადემიაში, სამოქალაქო ნაგებობათა არქიტექტურის ფაკულტეტზე. 2008 წლიდან სხვადასხვა კომპანიაში არქიტექტორის თანაშემწედ მუშაობდა. 2012 წლის აპრილიდან კი ბორჯომის მუნიციპალიტეტის ეკონომიკისა და ინფრასტრუქტურის სამსახურში სივრცით-ტერიტორიული მოწყობის და ურბანული დაგეგმარების მთავარ სპეციალისტად მუშაობდა.

„ბორჯომში ჩამოსვლა კვალიფიკაციის ამაღლების მიზნით გადავწყვიტე, რადგან საკურორტო - სარეკრეაციო ზონაა, აქ ჩამოდიან ცნობილი არქიტექტორები სხვადასხვა დაკვეთებით. გიწევს ურთიერთობა ცნობილ და გამოცდილ ადამიანებთან და არა დამწყებ არქიტექტორებთან. ამიტომ მომავალი განვითარებისთვის ჩემი ჩამოსვლა ბორჯომში აუცილებელი იყო“, - ამბობს რევაზ კალაძე.

2012 წლის ნოემბრიდან გამგებლის მოადგილედ გიორგი ხომერიკი მუშაობდა. მან კონკურსში მონაწილოება ჯანმრთელობასთან დაკავშირებული პრობლემების გამო არ მიიღო.

[თინათინ ზაზაძე,ბორჯომი]