დემოკრატიული რესპუბლიკის 100 წლისთავი – სამოქალაქო კვირეული ახალციხეში

საინფორმაციო შეხვედრა დღეს, 22 მაისს, 14:00 საათზე ახალციხის დემოკრატიული ჩართულობის ცენტრში გაიმართა.
იგი მიზნად, საქართველოს დემოკრატიული რესპუბლიკის შესახებ, რეგიონებში ადგილობრივი მოსახლეობის, ახალგაზრდების, სამოქალაქო სექტორისა და მედიის წარმომადგენლებისათვის ცნობიერების ამაღლებას ისახავს.

შეხვედრის ორგანიზება არასამთავრობო ორგანიზაცია "სიდამ" და სამოქალაქო საზოგადოების რეგიონულმა ქსელმა, დემოკრატიული ჩართულობის ცენტრთან პარტნიორობით განახორციელა.

შეხვედრაზე, საქართველოს დემოკრატიული რესპუბლიკის შემსწავლელი ცენტრის წარმომადგენლებმა რესპუბლიკის დამფუძნებელი მამებისა და კულტურის შესახებ ისაუბრეს.

"რესპუბლიკის ჩამოყალიბებაში ერთ–ერთი მნიშვნელოვანი პიროვნება ნოე ჟორდანია იყო. იგი მიწის მფლობელი გლეხის შვილი იყო, რომელმაც გარკვეული პერიოდი ისწავლა ვარშავაში ვეტერინარულ სასწავლებელში. შემდეგი პერიოდი კი თვითგანათლებას მიუძღვნა. იგი იმ პერიოდის პოლიტიკურად მნიშვნელოვან ფიგურებს დაუახლოვდა", – აღნიშნა საქართველოს დემოკრატიული რესპუბლიკის შემსწავლელი ცენტრის ხელმძღვანელმა ირაკლი ირემაძემ.

შეხვედრაზე მან ასევე ისაუბრა 1919 წლის საქართველოს პირველ მრავალპარტიული და დემოკრატიული არჩევნების შესახებ და მასში ქალთა ჩართულობაზე – "26 ქალი კანდიდატი იყო რეგისტრირებული 1919 წლის დამფუძნებელი კრების არჩევნებზე. ისინი აქტიურ როლს თამაშობდნენ რესპუბლიკის საქმიანობაში, საკანონმდებლო საქმიანობაში, უკვე დამფუძნებელ კრებაში. მის გარეთ, საგანმანათლებლო კუთხით, ქალთა შრომის მიმართულებით იქმნებოდა ჯგუფები და მთავრობას წარუდგენდნენ ხოლმე წინადადებებს", – ამბობს ირაკლი ირემაძე.
მსგავსი ტიპის შეხვედრები 21–დან 25 მაისის ჩათვლით საქართველოს ცხრა რეგიონში ჩატარდება.

სამოქალაქო კვირეულს ფინანსურ მხარდაჭერას აღმოსავლეთ–დასავლეთის მართვის ინსტიტუტი (EWM) ACCESS-ის პროექტი უწევს.



[მარიამ ბარძიმაძე, ახალციხე]