დვირის რწმუნებული არაკომპეტენტური პასუხის გამო გაათავისუფლეს

რწმუნებულს ხელშეკრულება ერთი კვირის წინ შეუწყდა. მოვალეობის შემსრულებლად კი ლაშა კევლიშვილი დაინიშნა.

„მითხრეს გამოსაცდელი ვადით იყავით დანიშნული და ახლა გათავისუფლებული ხარო“,-განაცხადა სატელეფონო საუბარში ყოფილმა რწმუნებულმა.

ბორჯომის მუნიციპალიტეტის გამგეობაში განმარტავენ, რომ გათავისუფლების გადაწყვეტილება მას შემდეგ მიიღეს, რაც რწმუნებულმა სოფლის მხარდაჭერის პროგრამასთან დაკავშირებით ჟურნალისტს არაკომპეტენტური პასუხი გასცა.

„რწუნებულმა ჟურნალისტს არასწორი ინფორმაცია მიაწოდა, რის გამოც მისი მუშაობა არადადებითად შეფასდა და მას სამუშაო ხელშეკრულება შეუწყდა“,-ამბობს ბორჯომის მუნიციპალიტეტის გამგებელი დიმიტრი ბერიძე.

შეგახსენებთ, რომ გაზეთ „სამხრეთის კარიბჭეს“ 27 მაისის ნომერში გამოქვეყნებულ სტატიაში სათაურით „ბორჯომში სოფლის მხარდაჭერის პროგრამა საკამათო გახდა“, დვირის ყოფილი რწმუნებული ამბობს, რომ მის ტერიტორიულ ორგანოში „სოფლის მხარდაჭერის პროგრამის“ ფარგლებში კრება არ ჩატარებულა.

ბორჯომის მუნიციპალიტეტის გამგეობაში კი განმარტავენ, რომ ყველა სოფელში კრება ჩატარებულია და ამის დამამტკიცებელი ოქმებიც არსებობდა.

ბორჯომის მუნიციპალიტეტში ტერიტორიული ორგანოს რწმუნებულები სამი თვის გამოსაცდელი ვადით მიმდინარე წლის 11 აპრილს კონკურსის წესით აირჩიეს.

დვირის ტერიტორიულ ორგანოს რწმუნებულს უახლოეს მომავალში ისევ კონკურსის წესით აირჩევენ.

[თინათინ ზაზაძე, ბორჯომი]