ახალციხეში გენოციდისადმი მიძღვნილი მსვლელობა გაიმართა [Photo/Video]

"აღიარე!"–ამ შეძახილით სომეხი მოსახლეობა თურქეთსა და მსოფლიოს მოუწოდებს, რომ 1915 წელს, ოსმალეთის იმპერიაში სომეხთა დახოცვა მასობრივ გენოციდად აღიარონ.

დღეს, 24 აპრილს, ახალციხეში გენოციდის 103–ე წლისთავი აღნიშნეს. ეთნიკურად სომეხი მოსახლეობა ქალაქში მუნიციპალიტეტის სოფლებიდანაც ჩამოვიდა. მათ დაახლოებით ორ კილომეტრიანი გზა ფეხით ერთობლივად გაიარეს.

"მილიონ ნახევარი სომეხი მოკლეს, ჩვენ ვთხოვთ მსოფლიოს ყველა ქვეყანას, რომ თურქების მიერ განხორციელებული გენოციდი აღიაროს", – ამბობს ამბარცუმ ბაბოიანი.

თარიღთან დაკავშირებით, გრიგოლ განმანათლებლის სახელობის სომხურ ეკლესიაში გენოციდის დროს გარდაცვლილთა მოსახსენიებელი პარაკლისი გადაიხადეს. რის შემდეგაც, მსვლელობა გაიმართა, ტაძრიდან აბის დასახლებამდე, სადაც გენოციდის მსხვერპლთა მემორიალი, იგივე "ხაჩკარია"(ქვის ჯვარი) განთავსებული.

მსვლელობის მონაწილეებმა, გარდაცვლილთა სულების მოსახსენიებელი პარაკლისი კიდევ ერთხელ, „ხაჩკართან“ გადაიხადეს და მემორიალი ყვავილებით შეამკეს.













ეთნიკური სომხების მასობრივი დეპორტაციის დაწყების თარიღად 1915 წლის 24 აპრილი ითვლება, როდესაც ხელისუფლებამ 250–მდე სომეხი ეროვნების ინტელექტუალი და თემის ლიდერი ჯერ დააპატიმრა, შემდეგ კი სიკვდილით დასაჯა.

სომხები, რომლებიც ოსმალთა იმპერიის არმიაში მსახურობდნენ, განაიარაღეს და მოკლეს, კონფისკაცია გაუკეთეს მათ ქონებასაც.

პროცესი 1918 წლის სექტემბრამდე გაგრძელდა. სომხური მხარე ამბობს, რომ სამი წლის განმავლობაში 1,5 მილიონზე მეტი ადამიანი დაიღუპა.

თურქეთი მიიჩნევს, რომ დაღუპულთა რიცხვი ბევრად ნაკლებია. ასევე, უარყოფს ტერმინს – "გენოციდი". თურქული მხარე აცხადებს, რომ ეთნიკურ სომეხთა უმრავლესობა პირველი მსოფლიო ომის დროს სამხედრო შეტაკებებს შეეწირა, ისევე როგორც ათასობით ეთნიკურად თურქი.

გენოციდის დროს დაღუპულები სომხურმა ეკლესიამ 2015 წელს წმინდანად შერაცხა.

საქართველოს სომეხთა გენოციდი ოფიციალურად აღიარებული არ აქვს.

სომეხი ეროვნების მოქალაქეები ყოველ წელს ითხოვენ თურქეთისგან, აღიაროს სომეხთა გენოციდი. ისევე, როგორც ამას ითხოვენ საქართველოსგან.




[მარიამ ბარძიმაძე, ახალციხე]