თამარაშვილის ქუჩაზე მოსახლეობა მოკლე გზით სარგებლობას ითხოვს

საქართველოს რკინიგზამ ახალციხეში, თამარაშვილის ქუჩაზე მცხოვრებლებს, ქალაქთან დამაკავშირებელი მოკლე გზით სარგებლობა აუკრძალა. უკვე ერთი თვეა რაც რკინიგზამ ახალციხე– ვალის დამაკავშირებელი ხაზის ორივე მხარეს მიწა ამოთხარა. თუმცა, ადგილობრივებმა ეს ადგილი გაასწორეს და კვლავ ამ გზაზე მოძრაობენ. პარალელურად მათ დასახმარებლად ახალციხის მერიას მიმართეს.

„მოქალაქეების მომართვის საფუძველზე მივწერეთ რკინიგზას და ვთხოვეთ, რომ გადასასვლელის გაუქმების პროცესი შეეჩერებინათ, თუმცა, უარი მივიღეთ“, – ამბობენ ახალციხის მერიის საზოგადოებასთან ურთიერთობის სამსახურში.

რკინიგზის ადმინისტრაცია უარს მოსახლეობის უსაფრთხოებით ხსნის: „ეს იყო უკანონო გადასასვლელი, რომელიც აქამდე სამწუხაროდ არსებობდა. თუმცა, არ იყო დატვირთული ლიანდაგი და დემონტაჟის საჭიროებაც არ იდგა. ახლა ეს მონაკვეთი დაიტვირთება და მოძრაობა იქნება ინტენსიური, რაც გაზრდის რისკებს უსაფრთხოების თვალსაზრისით. მოვუწოდებთ ყველას, რომ ისარგებლონ მხოლოდ კანონიერი გადასასვლელებით“.

რაც შეეხება იმას, რომ ადგილობრივები კვლავ ლიანდაგის გავლით გადაადგილდებიან, საქართველოს რკინიგზაში ამის შესახებ არ იციან: „ეს არ ვიცოდით, შესაბამისი სამსახურების წარმომადგენლებს გამოვგზავნით და ხალხს კიდევ ერთხელ აუხსნიან, რომ ამ გზაზე გადასვლა არ შეიძლება და ეს უკანონობაა“.

ის, რომ მოკლე გზით სარგებლობა უკანონოა, ადგილობრივებმაც იციან. ამიტომ საქართველოს რკინიგზისგან აღნიშნულ მონაკვეთზე უსაფრთხოების ნიშნების დაყენებას ითხოვენ: „თუ ჩვენ მოთხვონას არ დააკმაყოფილებენ, მაშინ საპროტესტო აქციებს გავმართავთ“.

[თინათინ ზაზაძე, ახალციხე]