თამარაშვილის ქუჩაზე მოსახლოება მოკლე გზით ვეღარ ისარგებლებს [Photo]

მესამე დღეა თამარაშვილის ქუჩასთან დამაკავშირებელი ერთ–ერთი გზა, სადაც ახალციხე– ვალის დამაკავშირებელი სარკინიგზო ხაზი გადის, გადაკეტილია. ლიანდაგების ორივე მხარეს მიწაა ამოთხრილი და მანქანები ვერ გადადიან.

ადგილობრივები ამბობენ, რომ 12 წელია ამ გზით სარგებლობდნენ და აქამდე პრობლემა არ შექმნიათ.

„ერთი კვირის წინ საქართველოს რკინიგზის თანამშრომელი მოვიდა და გაგვაფრთხილა, ამ გზით აღარ ისარგებლოთო. 12 მარტს კი მიწა ამოთხარეს და ძველი „შპალები“ დაყარეს“, – ამბობს თამარაშვილის ქუჩაზე მცხოვრები რომან მამასახლისი.

„მოხუცები და ბავშვები გვყავს, როგორ მოვიქცეთ?! სახანძროს და სასწრაფოს მანქანებიც აქედან შემოდის. 12 წელია ამ გზით ვსარგებლობთ, მე თვითონ ვიყავი ჩასული რკინიგზის დეპარტამენტში და გვითხრეს, რომ შეგვეძლო ამ გზით სარგებლობა, ახლა რა შეიცვალა არ ვიცი“, – ამბობს ამავე ქუჩაზე მცხოვრები უშანგი ნათენაძე.



მისივე თქმით, აღნიშნული გზით თამარაშვილის ქუჩის მცხოვრებლების გარდა სოფლების: სვირის, ბოგისა და ტატანისის მოსახლეობაც სარგებლობს: „თივით დატვირთული მანქანები ხიდის ქვეშ ვერ ეტევიან და ამ გზით სარგებლობენ. მაღალი ძაბვა რომ გაყავთ, მათი მანქანებიც აქედან დადიან. როგორ შეიძლება ადგე და ეს გზა ჩაკეტო, ჩვენთვის გაუგებარია ეს გადაწყვეტილება“.

ადგილობრივები ამბობენ, რომ მათ დასახლებამდე მისასვლელი მეორე გზაც არსებობს, მაგრამ, მოუწესრიგებელია, – გრუნტის გზაა და მოხრეშილიც არ არის, რის გამოც მსუბუქი მანქანებისთვის გადაადგილება რთულია. აღნიშნული გზა ხელოვნურ ტყეზე გადის, რომლის სიგრძე დაახლოებით ორი კილომეტრია.

„სვირის გზაზე უნდა წახვიდე, ხიდში გაძვრე და იქიდან ჩამოუხვიო, ტყე უნდა გამოიარო. ამ გზაზე მარტო ორხიდიანი მანქანები დადიან და წვიმის დროს მათაც უჭირთ გადაადგილება“, – ამბობენ ადგილობრივები.

საქართველოს რკინიგზაში აცხადებენ, რომ თამარაშვლის ქუჩის მცხოვრებლები აქამდე მოკლე გზით უკანონოდ სარგებლობდნენ. ახლა მათ ამის საშუალება აღარ ექნებათ, რადგან სარკინიგზო ხაზის რეაბილიტაცია იწყება, შესაბამისად, იმოძრავებს მატარებელიც.

„ჩვენთვის აქტუალური გახდა ტვირთების გადაზიდვის საკითხი. ვალის სარკინიგზო სადგურიც უნდა გაკეთდეს. ამ პროექტის ფარგლებში მიმდინარეობს სარკინიგზო ხაზის რეაბლიტაცია. სამომავლოდ მოსახლეობა ამ გზით ვეღარ ისარგებლებს“, – აცხადებენ საქართველოს რკინიგზაში.



უწყების განმარტებით აღნიშნული ტერიტორია ახალციხეს ეკუთვნის. მომავალში თუ ქალაქის ხელმძღვანელობა გადაწყვეტს, რომ ეს გზა აღდგეს, თვითმმართველობასთან მოლაპარაკებები დაიწყება.

„ეს უკვე მერიის და რკინიგზის შეთანხმების საკითხი იქნება. ქალაქის ხელმძღვანელობა თუ გადაწყვეტს ამ გზის დატოვებას, რკინიგზაც ვალდებული იქნება დადგას ნიშნები უსაფრთხო გადაადგილებისთვის“, – განმარტავენ საქართველოს რკინიგზაში.

ადგილობრივებმა ახალციხის მუნიციპალიტეტის მერიას უკვე მიმართეს წერილობით. განცხადებას ხელს 14 ოჯახი აწერს.

„მოსახლეობისგან შემოსული წერილი შევისწავლეთ. ვამზადებთ შუამდგომლობის წერილს რკინიგზის დეპარტამენტთან“, – გვითხრეს ახალციხის მერიის საზოგადოებასთან ურთიერთობის სამსახურში.

მათივე განმარტებით, ორკილომეტრიან გზას, რომელითაც მოსახლეობა შეძლებს დასახლებამდე მისვლას, წელს მოხრეშავენ.












[თინათინ ზაზაძე, ახალციხე]