წყრუთში პიროპლაზმოზი გავრცელდა

რწმუნებულის თქმით, აღნიშნულის გამო მოსახლეობა შეწუხებულია.

”დაავადებულმა პირუტყვმა წველადობას უკლო. ერთი ძროხა ამ დაავადებით უკვე მოკვდა”, - ამბობს წყრუთის ტერიტორიული ორგანოს რწმუნებული ხაჩო ჩახოიანი.

მისივე თქმით, სოფელში დაავადების პირველი შემთხვევა არ არის. პიროპლაზმოზი გასული წლის შემოდგომაზეც დაფიქსირდა.

სურსათის უვნებლობის, ვეტერინარიისა და მცენარეთა დაცვის სამსახურში განმარტავენ, რომ პირუტყვის პიროპლაზმოზით დაავადების შემთხვევაში, მეპატრონემ საქონლის განკურნებაზე თავად უნდა იზრუნოს, რადგან მსგავსი ტიპის დაავადებები სახელმწიფო პროგრამით არ ფინანსდება.

”აღნიშნული დაავადება განსაკუთრებით საშიშ დაავადებათა ნუსხაში არ შედის. სახელმწიფო პროგრამით მხოლოდ განსაკუთრებით საშიში და საკარანტინო დაავადებების წინააღმდეგ პროფილაქტიკური ვაქცინაცია ფინანსდება. ამ ეტაპისთვის ჯილეხის კერებში პროფილაქტიკური ვაქცინაცია მიმდინარეობს, მისი დასრულების შემდეგ კი თურქულის, ცოფის, ტუბერკულოზისა და ბრუცელოზის სისხლის ნიმუშების გამოკვლევა იგეგმება”, - ამბობს სურსათის უვნებლობის, ვეტერინარიისა და მცენარეთა დაცვის სამსახურის პრესსამსახურის უფროსი ვერიკო გულუა და ამატებს, რომ მოსახლეობას დაავადების წინააღმდეგ სამკურნალო საშუალებების შეძენა ნებისმიერ ვეტერინარულ აფთიაქში შეუძლიათ.

პიროპლაზმოზი მწვავე სეზონური დაავადებაა, რომელიც ვლინდება მუდმივი ტიპის ციებ-ცხელებით, ანემიით, სიყვითლით, მუქი წითელი შარდის გამოყოფით.

ეკონომიკური დანაკარგი ენზოოტიის პერიოდში წარმოიშვება დაავადებული ცხოველების დახოცვისა და ლაქტაციის პერიოდში რძის პროდუქტიულობის დაქვეითების შეჯამებით.

დაავადების მკურნალობის დაწყება აუცილებელია დროულად, პირველი კლინიკური ნიშნის გამოვლენისთანავე.

[თინათინ ზაზაძე, ახალციხე]