ახალციხელი მძლეოსნები პარიზიდან დაბრუნდნენ

სასკოლო მსოფლიო ჩემპიონატში მონაწილეობის მისაღებად საქართველოდან ორი გუნდი გაემგზავრა, გოგონების გუნდი ახალციხის მესამე საჯარო სკოლიდან და N120–ე სკოლის ვაჟთა გუნდი თბილისიდან.

შეჯიბრი ოთხ აპრილს პარიზში, ელისეის მინდვრებზე ჩატარდა და მასში მონაწილეობა 25 ქვეყნის გუნდმა მიიღო. მე–19 ადგილზე გოგონები, ხოლო მე–13 ადგილზე ბიჭები გავიდნენ. ჩემპიონატში მსოფლიო პირველობა მაროკომ მოიპოვა, გოგონებშიც და ვაჟებშიც.

„მეტიც შეგვეძლო, მაგრამ გოგონები ცოტა დაძაბულები იყვნენ. 4 125 მეტრი ირბინეს, ჩვენი გუნდიდან პირველი 17 წუთსა და 31–ე წამზე მივიდა ფინიშთან“, – ამბობს ახალციხის მუნიციპალიტეტის მერიის სპორტული განყოფილების სპეციალისტი გელა ძამუნაშვილი.

მისი თქმით, შეჯიბრის შემდეგ გუნდის წევრებმა პარიზში ისტორიული ძეგლები და მუზეუმები დაათვალიერეს.

შეგახსენებთ, რომ ახალციხის მესამე საჯარო სკოლაში მძლეოსანი გოგონების გუნდი სამი წლის წინ შეიქმნა. გოგონებმა საქართველოს ჩემპიონობა 2017 წელს მოიპოვა.



[თინათინ ზაზაძე, ახალციხე]