კლინიკაში, სადაც ახალნამშობიარები ქალი გარდაიცვალა, ახალციხის მერი მივიდა [Video]

ზაზა მელიქიძე საავადმყოფოში შეკრებილი, გარდაცვლილის ნათესავების დამშვიდებას ცდილობს: "უკეთესია, რომ მივცეთ საშუალება გამოძიება ჩატარდეს ისე, როგორც საჭიროა. ველოდებით ექსპერტს, ჩამოვა თბილისიდან, თქვენს მიერ მოწვეულიც და სახელმწიფო ექსპერტიც და ორივე ერთად დაადგენს გარდაცვალების გამომწვევ მიზეზს. თუ გინდათ კიდევ სხვა ექსპერტის მოწვევა, ჩვენ მზად ვართ, თუ გნებავთ, შევაჩეროთ ექსპერტიზა და სხვა მოვიწვიოთ", – ეუბნება ახალციხის მერი გარდაცვლილი ახალგაზრდა ქალის ბიძას.

გარდაცვლილის ნათესავები საავადმყოფოს დირექციას არ ენდობიან და ამბობენ, რომ მან შეიძლება ექსპერტები მოისყიდოს.



შეგახსენებთ, ახალციხეში კლინიკა "იმედში", დღეს, 30 მარტს, დილით, მშობიარობიდან ორი დღის შემდეგ, 23 წლის ქალი გარდაიცვალა. გარდაცვლილის ოჯახის წევრების ინფორმაციით, ახალგაზრდა ქალმა 28 მარტს იმშობიარა. ექიმებმა მათ განუცხადეს, რომ დედაც და ჩვილიც თავს კარგად გრძნობდნენ. დღეს, 30 მარტს, დილით კი დაურეკეს და აცნობეს, რომ ცუდი ამბავი ჰქონდათ. ქალმა ფიზიოლოგიურად იმშობიარა. ეს მისი პირველი მშობიარობა იყო. ჩვილი თავს კარგად გრძნობს.

კლინიკის ხელმძღვანელი დავით მაისურაძე ოფიციალური კომენტარისგან თავს იკავებს. პირად საუბარში ამბობს, რომ ყველაფერი კარგად მიმდინარეობდა და ამ დილამდე რამე გართულება არ ყოფილა, დანარჩენს კი ექსპერტიზას დაადგენს.

გარდაცვლილის ახლობლები და თანასოფლელები ამ დრომდე საავადმყოფოში რჩებიან. ახალგაზრდა ქალის ცხედარი ექსპერტიზაზე გადაასვენეს. მომხდარზე ძიება შინაგან საქმეთა სამინისტრომ გაუფრთხილებლობით სიცოცხლის მოსპობის ფაქტზე, საქართველოს სისხლის სამართლის კოდექსის 116-ე მუხლის პირველი ნაწილით დაიწყო.



[თინათინ ზაზაძე, ნინო ნარიმანიშვილი, ახალციხე]