გარდაცვლილი ახალნამშობიარები ქალი სოფელში გადაასვენეს

გარდაცვლილს, სასამართლო–სამედიცინო ექსპერტთან ერთად, ექსპერტიზა, ოჯახის მოთხოვნით, თბილისიდან ჩამოყვანილმა დამოუკიდებელმა ექსპერტმაც ჩაუტარა.

გარდაცვლილის ექსპერტიზა, დაახლოებით, 19:00 საათზე დასრულდა.

შეგახსენებთ, რომ ახალციხეში, სოფელ წყრუთში მცხოვრები 23 წლის ახალგაზრდა კლინიკაში დღეს, 30 მარტს, დილით გარდაიცვალა. გოგონამ ორი დღის წინ, 28 მარტს, ფიზიოლოგიურად იმშობიარა. საავადმყოფოში ამბობენ, რომ მშობიარობამ გართულებების გარეშე ჩაიარა. ეს მისი პირველი მშობიარობა იყო.

გარდაცვლილის ოჯახის წევრები და ნათესავები საავადმყოფოს ეზოში შეიკრიბნენ. ისინი მომხდარში ექიმებს ადანაშაულებენ.

მომხდარზე ძიება შინაგან საქმეთა სამინისტრომ გაუფრთხილებლობით სიცოცხლის მოსპობის ფაქტზე, საქართველოს სისხლის სამართლის კოდექსის 116-ე მუხლის პირველი ნაწილით დაიწყო.

[თინათინ ზაზაძე, ახალციხე]