დარღვევები და დამკვირვებლები

13:30 საათის მონაცემებით ახალციხის ხუთ საჯარო სკოლაში არც საგანმანათლებლო რესურსცენტრის და არც განათლების სამინისტროს წარმომადგენლები საარჩევნო უბნებს არ აკვირდებოდნენ.

როგორც ”სამხრეთის კარიბჭეს” პირველ, მე-2, მე-3, მე-5 და მე-6 სკოლებში განუცხადეს, ამ დრომდე ვითარებით სამინისტროს და რესურსცენტრის წარმომადგენლები არ დაინტერესებულან.

ახალციხის საგანმანათლებლო რესურსცენტრის უფროსის მოვალეობის შემსრულებლის დიანა ინასარიძის განცხადებით, მათი წარმომადგენლები უბნებზე უკვე გასულები არიან და ვითარებას თითქმის ყველა სკოლაში პირადად ეცნობიან.

- ”განათლების სამინისტროს დამკვირვებლები, როგორც ვიცი, ახალციხის მე-4 საჯარო სკოლაში, საბარგო სადგურზე არიან. ჩემი ინფორმაციით სკოლა შემთხვევითი შერჩევის პრინციპით შეარჩიეს, თორემ აქ ძალიან მცირე კონტიგენტია, სულ 43 ამომრჩეველი უნდა მივიდეს”, - ამბობს ინასარიძე.

ამ დროისთვის არჩევნები მშვიდ ვითარებაში მიმდინარეობს.

უმნიშვნელო დაღვევა მხოლოდ მე-3 საჯარო სკოლაში დაფიქსირდა: ორმა მშობელმა ბიულეტენი შეცდომით, მასწავლებლებისთვის განკუთვნილ საარჩევნო ყუთში ჩააგდო.

მე-3 საჯარო სკოლის სამეურვეო საბჭოს კომიისის თავჯდომარის მადონა კბილაშვილის თქმით, მშობლებისთვის არჩევნების შესახებ კრება წინასწარ ჩატარდა: ”ყველას გავაცანით ინფორმაცია პროცედურებისა და კანდიდატების შესახებ”.

ინასარიძის განცხადებით, დარღვევები არც სოფლებში ფიქსირდება. მისივე თქმით, შუადღის შემდეგ არჩევნებზე აქტივობამ იკლო.

საარჩევნო უბნები 16:00 საათზე დაიხურება.

[თამუნა უჩიძე, ნუკა სტეფნაძე - ახალციხე]