იაპონიის მთავრობა მოხეში საბავშვო ბაღის მშენებლობას დააფინანსებს

პროექტის საგრანტო ხელშეკრულების ხელმოწერის ცერემონია დღეს, 14 მარტს, 13:00 საათზე, საქართველოში იაპონიის საგანგებო და სრულუფლებიანი ელჩის რეზიდენციაში გაიმართება.

ამ პროექტს World Vision–საქართველო განახორციელებს. ამ პროექტისთვის საელჩოს 66’395 აშშ დოლარი აქვს გამოყოფილი.

მოხეში 340 ოჯახი ცხოვრობს, მათი უმეტესობა მუსლიმია. სოფელში ბაღი დაახლოებით ნახევარ საუკენეზე მეტია არ აქვთ.

"შედეგად, ბავშვების საბაზისო და განვითარების საჭიროებები არ არის დაკმაყოფილებული, რაც ზრდის ბავშვთა სიკვდილიანობას და ჯანმრთელობის ზიანს. პროექტის მიზანია პირველი ბაღის აშენება ამ დასახლებაში – პირველად, ბოლო რამდენიმე ათწლეულის განმავლობაში", – ვკითხულობთ საელჩოს მიერ გავრცელებულ პრესრელიზში.

იაპონიის მთავრობა დღეს ორი პროექტის საგრანტო ხელშეკრულებას აწერს ხელს. კიდევ ერთი პროექტის ფარგლებში, საგანგებო სიტუაციების მართვის სააგენტოს, თბილისის ტერიტორიაზე სამაშველო ოპერაციების ჩასატარებლად მეორადი სახანძრო ტექნიკა გადაეცემა.

სახანძრო ტექნიკა განკუთვნილია ისანი–სამგორის ტერიტორიისთვის და საჭიროებისამებრ, შესაძლებელი იქნება მისი სწრაფი გადაადგილება თბილისის დანარჩენ ტერიტორიაზე (რაც პოტენციურად დაფარავს 27’580 ჰექტარს და გადაარჩენს ათასობით სიცოცხლეს). იაპონიის საელჩოს დაფინანსება ამ პროექტისთვის შეადგენს 99’733 აშშ დოლარს.

პროექტები დაფინანსებულია იაპონიის მთავრობის მიერ „გრასრუტების ადამიანთა უსაფრთხოების საგრანტო პროგრამის“ ფარგლებში. „გრასრუტების საგრანტო პროგრამა“ დახმარებას უწევს შედარებით მცირემასშტაბიან პროექტებს და მიზნად ისახავს საქართველოს მოსახლეობის ცხოვრების დონის გაუმჯობესებას და განათლებისა და კულტურის ხელშეწყობას. საგრანტო პროგრამა ხორციელდება ისეთ სფეროებში, როგორებიცაა საზოგადოებრივი ჯანდაცვა, განათლება, სოციალური დაცვა, სოფლის მეურნეობა, გარემოს დაცვა, სიღარიბის დაძლევა და კულტურა. 1998 წლიდან დღემდე ამ პროგრამის ფარგლებში საქართველოში დაფინანსდა 163 პროექტი, რომელთა საერთო ღირებულებამ 16’642’524 აშშ დოლარი შეადგინა.

[ნინო ნარიმანიშვილი, ადიგენი]