ბორჯომის საკრებულოს ოპოზიცია: თავმჯდომარის იმპიჩმენტი ხელფასების საკითხს არ უკავშირდება

დეპუტატების განცხადებით, მათი დღევანდელი ბოიკოტის მიზანი მოსალოდნელი ინცინდენტების თავიდან აცილება იყო: "მივეცით საშუალება მშვიდად მიეღოთ გადაწყვტილება, არ გვინდოდა რამე დაპირისპირება მომხდარიყო".

ისინი ამბობენ, რომ რეალურად დღეს დადასტურდა "ქართული ოცნებისა" და "პატრიოტთა ალიანსის" პოლიტიკური ქორწინება: "იმპიჩმენტის რეალური მიზეზი ხელფასების საკითხი არ იყო. რეალურად, "ოცნებამ" ვერ აიტანა ოპოზიციონერი დეპუტატი თავმჯდომარის პოზიციაზე".



მათივე განცხადებით, ვინც არ უნდა დასახელდეს საკრებულოს თავმჯდომარის კანდიდატად, ის ყველა შემთხვევაში იქნება ოცნების კადრი და არა ოპოზიციის: "მიზეზი ძალიან მარტივია, ნათლად გამოჩნდა, რომ ექვსი "პატრიოტი" წავიდა ზაზას წინააღმდეგ, უმრავლესობა "ოცნებას" ჰქონდა და ამიტომ კანდიდატად ის უნდა დააყენონ, ვინც მათ უნდათ".

შეგახსენებთ, რომ დღეს საკრებულოს თავმჯდომარის იმპიჩმენტს "ქართული ოცნების" 13–მა და "პატრიოტთა ალიანსის" 6–მა დეპუტატმა დაუჭირა მხარი. სხდომას 21 დეპუტატი ესწრებოდა (13 "ოცნებიდან", 8 "პატრიოტებიდან") და საკითხი გავიდა 19 ხმით, 2–ის წინააღმდეგ. იმპიჩმენტს არ დაეთანხმა "პატრიოტთა ალიანსის" ორი დეპუტატი: ვიოლეტა ბალახაშვილი და ფირან გოგიჩაიშვილი.

დეპუტატები ამბობენ, რომ ბოიკოტს გამოუცხადებენ იმ სხდომასაც, რომელზეც თავმჯდომარის არჩევის საკითხს დააყენებენ.



ისინი ირწმუნებიან, რომ ყველა წვრილმანს და დეტალს გაასაჯაროვებენ, რაც მომავალში ბორჯომის საკრებულოს სხდომებზე მოხდება.

[sknews.ge]