ბორჯომში არასაპარლამენტო ოპოზიციას ელოდებიან

ბორჯომის მუნიციპალიტეტის საკრებულოს ოპოზიციური პარტიების წარმომადგენლების განცხადებით, შეხვედრა დღეს, 27 მარტს, 13:00 საათზე დაიწყება.

„როგორც ვიცით ჩამოდიან ბურჯანაძე, კუკავა და ნათელაშვილი. მათი ჩამოსვლის მიზეზი ბორჯომის საკრებულოს თავმჯდომარის დაგეგმილი იმპიჩმენტია“, – ამბობს ბორჯომის მუნიციპალიტეტის საკრებულოს დეპუტატი „ლეიბორისტული პარტიიდან“ გიორგი გიუაშვილი.

„დემოკრატიული მოძრაობა ერთიანი საქართველო – ნინო ბურჯანაძის“ პარტიის ბორჯომის რაიონული ორგანიზაციის თავმჯდომარე მაია ხრიკაძე დაგეგმილი შეხვედრის შესახებ ინფორმაციას ადასტურებს: „თუმცა, ვინ მოდის პარტიიდან, ნამდვილად არ ვიცი“.

აღნიშნული შეხვედრის შესახებ ინფორმაცია არ აქვს ბორჯომის მუნიციპალიტეტის საკრებულოს აპარატს და საკრებულოს თავმჯდომარის მოადგილეს გიორგი გოგიჩაიშვილს.

„თუ რომელიმე ფრაქცია, ან დეპუტატი მართავს შეხვედრას, არაა სავალდებულო, რომ ეს აპარატთან შეთანხმებული იყოს“, – აცხადებენ ბორჯომის მუნიციპალიტეტის საკრებულოს აპარატში.

დღეს, საკრებულოში დაგეგმილ შეხვედრაზე არავის მიუწვევია „ქართული ოცნების“ დეპუტატები.

„ვიცით, რომ მოდიან პარტიების ლიდერები, მაგრამ ჩვენ ამ შეხვედრაზე დასასწრებად არ ვართ მიწვეულები“, – ამბობს ფრაქცია „ქართული ოცნების“ თავმჯდომარე ირაკლი კვირველია.

ხვალ, 28 თებერვალს ბორჯომის მუნიციპალიტეტის საკრებულო რიგით პირველ საკითხად გაიტანს თავმჯდომარის ზაზა ჩაჩანიძის გადაყენების საკითხს.

„დანარჩენი საკითხები კი მათ შორის ხელფასების მატება ამის შემდეგ იქნება განხილული“, – ამბობს ბორჯომის მუნიციპალიტეტის საკრებულოს თავმჯდომარის მოადგილე გიორგი გოგიჩაიშვილი.

[თამუნა უჩიძე, ბორჯომი]