საკადრო ცვლილებები სამცხე–ჯავახეთის პროკურატურაში

სამცხე–ჯავახეთის საოლქო პროკურატურის განყოფილების უფროსად პეტრე მანველიშვილი, ახალციხის რაიონულ პროკურორად კი დავით ჯინჭველაძე დაინიშნა.

პეტრე მანველიშვილმა ლერი სარაიდაროვი, დავით ჯინჭველაძემ კი გოდერძი გოდერძიშვილი ჩაანაცვლა.

გოდერძიშვილი საქართველოს მთავარ პროკურატურაში გენინსპექციაში გადაიყვანეს, სარაიდაროვი კი ასევე საქართველოს მთავარ პროკურატურაში პროკურორად.

ლერი სარაიდაროვი სამცხე–ჯავახეთის საოლქო პროკურატურის განყოფილების უფროსად და გოდერძი გოდერძიშვილი ახალციხისა რაიონულ პროკურორად სამი წელი მუშაობდნენ.

რაც შეეხება ახალდანიშნულ უფროსებს, მანველიშვილი აქამდე ახალციხის რაიონულ პროკურატურაში პროკურორი იყო, დავით ჯინჭველაძე კი ახალციხის რაიონული პროკურორის მოადგილე. მანველიშვილი პროკურატურაში პროკურორად 10 წელი მუშაობდა.

დავით ჯინჭველაძე კი აღნიშნულ უწყებაში 2002 წლიდანაა. მას სხვადასხვა დროს სხვადასხვა პოზიციები ეკავა. ჯერ იყო სტაჟიორი, შემდეგ ადიგენის პროკურორის თანაშემწე, მოგვიანებით საოლქო პროკურატურის გამომძიებელი და 2007 წლიდან კი ახალციხის რაიონული პროკურორის მოადგილე.

მანველიშვილი და ჯინჭველაძე მოვალეობის შესრულებას 12 თებერვლიდან შეუდგნენ.

„მანველიშვილის და ჯინჭველაძის ადგილზე ჯერ არავინ დაგვინიშნავს“, – აცხადებენ სამცხე–ჯავახეთის საოლქო პროკურატურაში.

[თამუნა უჩიძე, ახალციხე]