პოლიციელთა უფლებებს ყოფილი პოლიციელები დაიცავენ

მალხაზ ლაზარაშვილი შსს-ს ორგანოებში 1999 წლიდან მუშაობდა. ბოლოს, 11 თვის განმავლობაში, ახალციხის რაიონული სამმართველოს უფროსი იყო. თანამდებობიდან 2012 წლის 2 ნოემბერს, პირადი განცხადების საფუძველზე გაათავისუფლეს.

’თუმცა, იმას გამოვრიცხავ, რომ დიდი სურვილი მქონდა ამ განცხადების დაწერის”, - ამბობს და ამატებს, რომ განცხადების დაწერის მიზეზზე საუბარი ნაკლებად უნდა. მართალია, ფიქრობს, რომ უსამართლოდ გაათავისუფლეს, მაგრამ საკუთარი უფლებების დასაცავად არავისთვის მიუმართავს და არც ახლა აპირებს, - ’ შეიძლება მე ვფიქრობდე, რომ არასამართლიანი იყო ჩემი გათავისუფლება, მაგრამ მიმართვას არ ვაპირებ, ეს რომ მდომებოდა, აქამდეც გავაკეთებდი, ამ ორგანიზაციის გარეშე’.

ლაზარაშვილი ამ ეტაპზე უმუშევარია. ამბობს, რომ აპირებს ’სამართალდამცავთა დაცვის ლიგის’ წევრი გახდეს და სხვისი უფლებები დაიცვას.

საქართველოში სამართლიანი მართლმსაჯულების განხორციელება; კანონის უზენაესობის დაცვა და მისი ხელშეწყობა; სახელმწიფო მშენებლობის პროცესის ხელშეწყობა; სამართალდამცავი უწყებების მიერ საზოგადოებისა და საქმიანობის გამჭვირვალობისა და ანგარიშვალდებულების საქმიანობის ხელშეწყობა; სამართალდამცავი უწყებების მიერ ინიცირებული რეფორმების ანალიზი და საერთაშორისო სტანდარტებთან ადაპტირება; ადამიანის უფლებების და ღირსებების დაცვა და სამართალდამცავ უწყებებში დასაქმებულთა კანონით გარანტირებული უფლებების დაცვა; ასევე სამსახურეობრივი მოვალეობების დროს დაღუპული ან დაშავებული სამართალდამცავების და მათი ოჯახების მხარდაჭერა, - ეს ’სამართალდამცავთა დაცვის ლიგის’ ძირითადი მიზნებია.

ორგანიზაცია შსს-ს ყოფილმა მაღალჩინოსნებმა, მიმდინარე წლის თებერვალში დააფუძნეს. ’სამართალდამცავთა დაცვის ლიგას’ შინაგან საქმეთა მინისტრის ყოფილი მოადგილე ლევან გვაზავა ხელმძღვანელობს. ლიგას ჰყავს 6 ადვოკატი, რომლებიც ყოფილ, ან მოქმედ პოლიციელებს, რომლებიც ფიქრობენ, რომ მათი უფლებები ირღვევა, უფასო იურიდიულ დახმარებას ჰპირდებიან. ’სამართალდამცავთა დაცვის ლიგაში’ აცხადებენ, რომ ოფისის გახსნას საქართველოს ყველა რეგიონში გეგმავენ. დაფინანსების მოსაპოვებლად ორგანიზაცია საერთაშორისო დონორი ორგანიზაციებისთვის საგრანტო წინადადებით მიმართვას აპირებს.

ორგანიზაციის ერთერთი დამფუძნებელი ირაკლი ქადაგიძე ამბობს, რომ დაფუძნებიდან დღემდე ორგანიზაცია ექვს გახმაურებული საქმეს გამოეხმაურა. მათ შორის: 20 თებერვალს ე.წ. მატროსოვის ციხიდან პატიმარი სამართალდამცავების გადაყვანას მე-2 საპატიმროში, რაც მათი აზრით არასწორი იყო და შემდგომ ისევ უკან დააბრუნეს პატიმრები; ომბუცმენის ანგარიშს ლოპოტას ხეობაში ჩატარებულ სპეცოპერაციაზე, სადაც მათი აზრით უდანაშაულობის პრეზუმფცია დაირღვა; საიასა და აჭარის სამხარეო სამმართველოს უფროსს შორის მიმდინარე დავას, რა დროსაც, მათი აზრით, საია ნაჩქარევ დასკვნას აკეთებდა და მოითხოვდა სამმართველოს უფროსის თანამდებობიდან გათავისუფლებას; ორ საქმეზე კი, შინაგან საქმეთა სამინისტროს ზუგდიდის საპატრულო პოლიციიდან დავით ყოლბაიას გათავისუფლებისა და თბილისის პოლიციის თანამშრომლის დავით კუპრავას საქმეზე სასამართლოს მიმართეს. თუმცა, ჯერ წარმოება არ დაწყებულა.

ორგანიზაციის სამცხე-ჯავახეთის წარმომადგენელი ირკალი ბარძიმაძეა, რომელიც ბოლო 10 წელიწადი პროკურატურაში მუშაობდა, ჯერ რაიონულში, შემდგომ კი რეგიონულში. ამბობს, რომ პოლიციელთა პოლიტიკური ნიშნით გათავისუფლება ყოველთვის ხდებოდა, ყველა მთავრობის დროს და ამას სხვადასხვა მიზეზები აქვს. თავად სამსახურიდან 2011 წელს გაათავისუფლეს: ’თავისუფლად შემეძლო მეთქვა, რომ დაჩაგრული ვარ, მაგრამ ამას ვერ მივაწერ ხელისუფლებას, შეიძლება იყო ვინმეს პირადი ინტერესიც, მაგრამ მაინც, არ ვყოფილვარ სასწაული პოლიტიკური ფიგურა’.

კითხვაზე, რატომ ასოცირდებიან პოლიცილები მმართველ პოლიტიკურ ძალასთან, ბარძიმაძე ამბობს, რომ ნებისმიერი ადამიანი, რომელსაც აკავებენ, აცხადებს, რომ უდანაშაულოა და პოლიციელს უნებურად იმ ძალასთან აიგივებს, რომელიც ქვეყნის სათავეშია. ხშირად, არასწორი ინტერპრეტაცია ეძლევა პოლიცილების ქმედებას აქციების დროსაც და ამ დროსაც მათ პოლიტიკურ გუნდთან ასოცირებულებად მიიჩნევენ.

ირკალი ბარძიმაძე ამბობს, რომ ძალოვანი უწყების თანამშრომლები სამცხე-ჯავახეთში 2012 წლის ოქტომბრის შემდეგაც გაათავისუფლეს. მათი რაოდენობის შესახებ ზუსტი სტატისტიკა ჯერ არ აქვს: ’ვაპირებთ მოკვლევას, მივმართავთ სამმართველოებს გათავისუფლებული თანამშრომლების შესახებ მოგვაწოდონ ინფორმაცია. ვთხოვთ, რომ პირადადაც მოგვმართონ ასეთმა ადამიანებმა. ჩვენ არ ვართ პოლიტიკური ორგანიზაცია. ჩვენი მიზანია დავანახოთ ყველას, რომ შერჩევითობა არ მოგვიტანს სარგებელს’.

„სამართალდამცავთა დაცვის ლიგა“ საერთაშორისო ლიგაში გაწევრიანებას აპირებს. ლიგაში აცხადებენ რომ ეს აპოლიტიკური ორგანიზაციაა. სამცხე-ჯავახეთამდე ორგანიზაციამ შეხვედრა ორ რეგიონში გამართა.

[ნინო ნარიმანიშვილი, ახალციხე]