ახალციხის მერიამ საახალწლოდ ტენდერი 45 404 ლარზე გამოაცხადა

მთავარი → სიახლე, ეკონომიკა, საზოგადოება 12.12.2017

ახალციხის მერია საახალწლო მზადებას იწყებს. ტენდერში გამარჯვებული კომპანია ქალაქის ქუჩებს საახალწლო აქსესუარებით მორთავს. ტენდერი 45 404 ლარზეა გამოცხადებული.

ახალციხის მერიამ საახალწლოდ ტენდერი 45 404 ლარზე გამოაცხადა

ახალციხე, ცენტრალური პარკი. ფოტო: 25.12.2016 / სამხრეთის კარიბჭე

ტენდერში მონაწილეობის მსურველთათვის წინადადებების მიღება 16 დეკემბერს დაიწყება და ორ დღეში დასრულდება.

გამარჯვებულმა კომპანიამ არსებული ლითონის კონსტრუქციების დამონტაჟების გარდა, უნდა შეიძინოს ახალი „ფერადი სტრინგები“. საახალწლოდ უნდა მოირთოს: ქალაქისა და სოფლების ცენტრალური ქუჩები, ქალაქში სკვერები და წრიულები, ასევე სოფლებში კულტურის სახლების მიმდებარე ტერიტორიები.

სატენდერო დოკუმენტაციის მიხედვით საახალწლო აქსესუარების მონტაჟის სამუშაოები უნდა განხორციელდეს ხელშეკრულების გაფორმებიდან 2017 წლის 31 დეკემბრამდე, ხოლო საახალწლო აქსესუარების დემონტაჟის სამუშაოები უნდა განხორციელდეს 2018 წლის 16 იანვრიდან 2018 წლის 19 იანვრამდე.

გარდა ქუჩების მორთვისა, ადგილობრივმა თვითმმართველობამ ტენდერი საახალწლო ტკბილეულის შესაძენადაც გამოაცხადა. შესყიდვის სავარაუდო თანხა 8 000 ლარია. შეძენილი ტკბილეული მუნიციპალიტეტში მცხოვრებ პატარებს დაურიგდება.

[თინათინ ზაზაძე, ახალციხე]