ბორჯომის ქუჩები საახალწლოდ ირთვება

ბორჯომის მუნიციპალიტეტის გამგებლის დიმიტრი ყიფიანის თქმით, ცენტრალური მაგისტრალის ნაწილი უკვე განათდა, ნაწილზე კი სამუშაოები ამ წუთებშიც მიმდინარეობს.

„სადღესასწაულო აქსესუარების და ილუმინაციების მოწყობა დაბა ბაკურიანიდან დავიწყეთ, სადაც განათებები ცენტრალური გზაზე მოეწყო და მოირთო ნაძვის ხე. სამ დღეში სამუშაოები ბორჯომშიც დასრულდება. სრულად განათდება ქალაქის ცენტრალური ნაწილი და კოსტავას ქუჩა, მოირთვება ასევე ცოცხალი ნაძვის ხე“, - ამბობს დიმიტრი ყიფიანი.

შეგახსენებთ, რომ ახალ წლის დადგომასთან დაკავშირებით, მთავარი ღონისძებები ბორჯომსა და ბაკურიანში 31 დეკემბერს გაიმართება, თუმცა კომპანია, რომელმაც საახალწლო ღონისძიებების ჩატარებას უზრუნველყოფს, ამ დრომდე არ გამოვლენილა.

ადგილობრივმა თვითმმართველობამ ტენდერი 10 ოქტომბერს გამოაცხადა. სატენდერო კომისიამ ტენდერში მონაწილე ოთხი პრეტენდენტიდან, სამს არასრული დოკუმენტაციის გამო დისკვალიფიკაცია მიანიჭა. მოლაპარაკებები მეოთხე კომპანიასთან მიმდინარეობს.

გამოვლინდება თუ არა გამარჯვებული დღეს, 20 დეკემბერს, დღის ბოლომდე გაირკვევა.



[sknews.ge]