ოჯახში ძალადობის თემაზე ახალგაზრდებთან შეხვედრა გაიმართა

შეხვედრა „დემოკრატ მესხთა კავშირში გაიმართა“ და მას სკოლების უფროსი კლასების მოსწავლეები, ასევე სტუდენტები ესწრებოდნენ. მათ საპატრული პოლიციის ინსპექტორი ელისო ლომიძე, რომელიც აღნიშნულ უწყებაში 12 წელია მუშაობს, ოჯახში ძალადობის შემთხვევებზე და მის გამომწვევ მიზეზებზე ესაუბრა.

ინსპექტორმა ყურადღება მსხვერპლის მიერ ძალადობის ფაქტის მიჩქმალვაზე გაამახვილა. მისი თქმით, ასევე ხშირია შემთხვევა, როდესაც მსხვერპლს მოძალადის შესახებ ისეთი ინფორმაციის გაცემა არ უნდა, რაც სამართალდამცავებს მომხდარის გამოძიებაში დაეხმარება.

„ხშირად გულგრილია მომხდარის მიმართ საზოგადოებაც. ძალადობის ფაქტს არა ერთი მოქალაქე შეიძლება შეესწროს, დაინახოს რა მოხდა, მაგრამ როცა ადგილზე სამართალდამცავი მიდის და პირველად გამოკითხვას ატარებ თუ რა მოხდა, იმ მიზნით, რომ რაც შეიძლება სწრაფად დააკავოს მოძალადე, ამბობენ, რომ არაფერი იციან და არაფერი დაუნახავთ“, – ამბობს ლომიძე.

მოსწავლეების თქმით, ფსიქოლოგიური ძალადობა ხშირად მათ სამეგობროში და სკოლებშიც ხდება.

„ახალ სამეგობროში შეიძლება დაგაძალონ რაღაცა ისეთი, რასაც თვითონ აკეთებენ და შენ არა, მაგალითად სიგარეტის მოწევა. ასეთ დროს უნდა შეძლო თავის დაცვა“, – ამბობს ერთ–ერთი მათგანი.

მის წინ მჯდომმა კი ყურადღება სკოლებში მასწავლებლების მხრიდან მოსწავლეების მიმართ ფსიქოლოგიურ ძალადობაზე გაამახვილა: „მაგალითად, როცა ორი ბავშვი ჩხუბობს ერთს ემხრობიან, მეორეზე კი ფსიქოლოგიურად ძალადობენ. ეს მათზე ძალიან ცუდად მოქმედებს“.

„დემოკრატ მესხთა კავშირის“ წარმომადგენლის ჯაბა ნათენაძის თქმით, ძალადობის თემაზე შეხვედრის ჩატარება მათი ორგანიზაციის ინიციატივა იყო: „გვინდოდა რომ ამ თემაზე მომხსენებელი შინაგან საქმეთა სამინისტროს თანამშრომელი ყოფილიყო. ბავშვებმა უნდა იცოდნენ როდის ვის მიმართონ, რას აკეთებს სახელმწიფო ძალადობის მსხვერპლთა დასაცავად და თავად რა მნიშვნელობა აქვს ძალადობის შემთხვევაში სამართალდამცავებისთვის ინფორმაციის მიწოდებას“.

მისივე თქმით, მათ ეს შეხვედრა 25 ნოემბერს გენდერულ ძალადობასთან ბრძოლის საერთაშორისო დღესაც დაუკავშირეს: „ასევე, შინაგან საქმეთა სამინისტრო ახორციელებს კამპანიას „ძალა ნდობას“. ამ კამპანიის მიზანი მოსახლეობაში ძალადობის წინააღმდეგ ბრძოლასთან დაკავშირებით ცნობიერების ამაღლებაა“.

[თამუნა უჩიძე, ახალციხე]