სამცხე–ჯავახეთის სატყეო სამმართველოს ახალი უფროსი ჰყავს

გარემოს დაცვის სამინისტროში აცხადებენ, რომ სამმართველოში კონკურსი ორ კვირაში გამოცხადდება. მსგავს მდგომარეობას სამინისტროში რეორგანიზაციით ხსნიან.

”სამინისტროს აბსოლიტურად ყველა წარმომადგენელი გუშინ გადაინიშნა, ამჟამად ყველა დროებით მოვალეობის შემსრულებელია”, - გვითხრა სატელეფონო საუბარში გარემოს დაცვის სამინისტროს პრესსამსახურის ხელმძღვანელმა ინგა ნიკაგოსიანმა.

შეგახსენებთ, რომ სატყეო სფერო მიმდინარე წელს გარემოს დაცვისა და ბუნებრივი რესურსების სამინისტროს გამგებლობაში გადავიდა.

სატყეო სექტორის მართვას სამინისტრო განახორციელებს ახლად შექმნილი სტრუქტურული ქვედანაყოფის - სატყეო პოლიტიკის სამსახურისა და ახლად შექმნილი საჯარო სამართლის იურიდიული პირის - ეროვნული სატყეო სააგენტოს მეშვეობით.

სსიპ ეროვნული სატყეო სააგენტო განახორციელებს ტყის ფონდის მართვას, უზრუნველყოფს ტყის ფონდის ტერიტორიაზე საქმიანობის დაგეგმვას და განხორციელებას, მათ შორის, მოსახლეობის მერქნულ რესურსზე მოთხოვნილების დაკმაყოფილების, ტყეების მოვლისა და აღდგენის ღონისძიებებს. ამავდროულად, სააგენტო პასუხისმგებელი იქნება ტყის ფონდის ტერიტორიაზე ბიოლოგიური მრავალფეროვნების კომპონენტების მდგრად გამოყენებაზე, განახორციელებს ტყითსარგებლობის რეგულირებასა და კონტროლს.

[თინათინ ზაზაძე, ახალციხე]