ბორჯომში ‘ახალი ტყის კოდექსი’ განიხილეს

შეხვედრას ბორჯომის მუნიციპალიტეტის გამგებელი დიმიტრი ყიფიანი, გამგებლის პირველი მოადგილე ანზორ სვანიძე, სამცხე-ჯავახეთის მხარეში შემავალი მუნიციპალიტეტებისა და არასამთავრობო სექტორის წამომადგენლები ესწრებოდნენ.

ახალი კანონპროექტის შესახებ სსიპ ეროვნული სატყეო სააგენტოს უფროსმა თორნიკე გვაზავამ და გარემოსა და ბუნებრივი რესურსების დაცვის სამინისტროს სატყეო პოლიტიკის სამსახურის უფროსმა კარლო ამირგულაშილმა ისაუბრეს.

„საქართველოს ეროვნული სატყეო კონცეფციიდან“ გამომდინარე, კანონპროექტი ემყარება ტყის მდგრადი მართვის პრინციპებს, რაც საქართველოს ტყეების ეკოლოგიური, სოციალური და ეკონომიკური პრინციპების გათვალისწინებით მართვას გულისხმობს..

კარლო ამირგულაშვილის განმარტებით, ტყის კოდექსის ძირითადი მიმართულებები განსაზღვრავს ტყეების უმნიშვნელოვანესი ფუნქციების შენარჩუნებასა და დაცვას. ასევე, დგინდება ტყის კატეგორიზაციის სრულიად ახლებური წესი. თითოეული კატეგორიის ტყე გამოყოფილია მისი ფუნქციური დანიშნულებიდან გამომდინარე.

კანონპროექტის ერთ-ერთ მთავარ სიახლეს წარმოადგენს საქართველოში ტყეზე საკუთრების ახალი ფორმების შემოღება. თუ ამჟამად ტყის მესაკუთრე არის მხოლოდ სახელმწიფო, ახალი კანონის მიხედვით გვაქვს საკუთრების სამი სახე: სახელმწიფო, ადგილობრივი და კერძო საკუთრება, რაც ევროპული სტანდარტის შესაბამისია.

აღნიშნული პროექტის განხილვა მთელი საქართველოს მასშტაბით მიმდინარეობს. დღეს, 18 თებერვალს, კანონპროექტს ახალციხეში განიხილავენ. შეხვედრა ამ წუთებში სამცხე–ჯავახეთის სატყეო სამმართველოში მიმდინარეობს.

ტყის ახალი კოდექსი 2017 წლის 1 იანვრიდან უნდა ამოქმედდეს.



[ნინო ნარიმანიშვილი, ბორჯომი]