ახალციხეში საქართველოს საგარეო კურსზე იმსჯელეს

ალექსი პეტრიაშვილი სამცხე-ჯავახეთის სახელმწიფო სასწავლო უნივერსიტეტს ადმინიტრაციის მოწვევით ესტუმრა. სტუდენტები მინისტრათან შესახვედრად ორი კვირის განმავლობაში ემზადებოდნენ.

”გვინდოდა გაგვეგო რა დამოკიდებულებაა აქვს მთავრობას ნატოში გაწევრიანების საკთხთან დაკავშირებით. სურვილი გვქონდა შევხვედროდით ამ საკითხებში კომპეტენტურ პიროვნებას და მოვიწვიეთ სტუმრად მინისტრი.
სტუდენტები ორი კვირა ემზადებოდნენ ამ შეხვედრისთვის, ლექტორები უჩა ბლუაშვული და გიორგი ჭილაძე უკითხავდნენ სემინარებს რა არის ევროინტეგრაცია, რა არის ჩვენთვის ნატო და მომზადებულები დახვდნენ მინისტრს”, - ამბობს სამცხე-ჯავახეთის სახელმწიფო სასწავლო უნივერსიტეტის სასწავლო პროცესების მართვის სპეციალისტი მანანა იოსელიანი.

ალექსი პეტრიაშვილმა სტუდენტებს მოხსენება წაუკითხა. ამის შემდეგ შეხვედრა დისკუსიის რეჟიმში გაგრძელდა.

”მიმაჩნია, რომ ახალგაზრდებმა უნდა იცოდნენ რას აკეთებს ხელისუფლება იმისთვის, რომ დაჩქარდეს ნატოსა და ევროკავშირში საქართველოს ინტეგრაცია; რა პასუხისმგებლობას იღებს ქვეყანა; რა კეთილდღეობა მოაქვს საქართველოსთვის გრძელვადიანი, ეკონომიკური, პოლიტიკური სტაბილურობისა და უსაფრთხოების კუთხით”, - განაცხადა ალექსი პეტრიაშვილმა.

უნივერსიტეტის რექტორის მოვალეობის შემსრულებლის მერაბ ბერიძის თქმით, მსგავსი შეხვედრები სტუდენტებისთვის ძალიან მნიშვნელოვანია: ”სტუდენტებს ექნებათ საშუალება დასვან კითხვები მათთვის საინტერესო საკითხებზე. ამით ჩვენი სტუდენტები, და არამარტო სტუდენტები, მეტად ინფორმირებული იქნებიან”.

დისკუსიის დაწყებამდე მინისტრმა უნივერსიტეტის ორივე კორპუსი დაათვალიერა.

[ნუკა სტეფნაძე, ახალციხე]