საგამოცდო ციებ-ცხელება გრძელდება

ახალციხის პირველი საჯარო სკოლის მეთორმეტე კლასის მოსწავლე ანა დალალიშვილი გამოცდიდან უკვე გამოვიდა. შედეგით კმაყოფილია, 15 წუთში 9,24 ქულა დააგროვა: „არ იყო რთული კითხვები, უბრალოდ დაფიქრება სჭირდებოდა. დასმულ კითხვას ოთხივე მოცემული პასუხი შეესაბამებოდა, ამიტომ უფრო მეტად უნდა გეაზროვნა“.

დალალიშვილი ინგლისური ენის რეპეტიტორთან მეცადინეობს, თუმცა ამბობს, რომ იგივე შედეგს რეპეტიტორთან მიღებული ცოდნის გარეშეც დააგროვებდა.

დალალიშვილის თანაკლასელმა მაია გოგოლაძემ 8,84 ქულა მიიღო. მეგობრისგან განსხვავებით მიღებული შედეგით უკმაყოფილოა: „დამაბნეველი კითხვები იყო. თუმცა, არა იმდენად რთული რომ ვინმემ ბარიერი ვერ გადალახოს“.

საატესტატო გამოცდებზე გადასალახი ბარიერი 5,5-ია. ახალციხის მეექვსე საჯარო სკოლის მეთორმეტეკლასელი ბექა ვარდიძისთვის 5,6-იც დამაკმაყოფილებელია: „ჯერ არ შევსულვარ გამოცდაზე, არ აქვს მნიშვნელობა რამდენ ქულას ავიღებ, მთავარია ატესტატი მივიღო“.

მიღებული შედეგით უკმაყოფილოა ამავე სკოლის მეთორმეტეკლასელი ალექსანდრე ბერიძე: „ისე ვნერვიულობდი რომ 4:00 საათის შემდეგ არ მიძინია. ნერვიულობის გამო 7 ქულა მივიღე. დროების ჩასმა გამიჭირდა, არტიკლისა და აღმატებითი ხარისხების შესახებ კითხვები მარტივი იყო“.

მეექვსე საჯარო სკოლაში მეთორმეტეკლასელთა უმრავლესობამ ჩასაბარებლად ინგლისური ენა აირჩია, ნაწილი გერმანულს აბარებს.

- „ამ დრომდე ვინც გამოვიდა, მათი დონიდან გამომდინარე,მიღებული შედეგები დამაკმაყოფილებელია. ერთმა მოსწავლემ 10-იც მიიღო. გუშინდელ გამოცდაზე არავინ ჩაჭრილა და ვფიქრობ, დღესაც ასეთივე შედეგი გვექნება“, - გვითხრა მეექვსე საჯარო სკოლის დირექტორმა ზაზა თამარაშვილმა.

[თამუნა უჩიძე, ახალციხე]