ბორჯომში გარევაჭრობა აიკრძალა

”მოვაჭრეები გაგებით მოეკიდნენ ამ ფაქტს და ქალაქის ქუჩები უკვე გაწმენდილია. მათი თხოვნით, წინასააღდგომოდ ვაჭრობის ნება დავრთეთ, დღეიდან კი ყველა ბორჯომის აგრარულ ბაზარში გადავა”, - გვითხრა მუნიციპალიტეტის საკრებულოს თავმჯდომარემ ბესიკ ქურდაძემ.

შეგახსენებთ, რომ ბორჯომის მუნიციპალიტეტის საკრებულოს გადაწყვეტილებით ქალაქის ქუჩებში ყოველგვარი პროდუქტის გაყიდვა პირველი მაისიდან უნდა აკრძალულიყო. თუმცა, სააღდგომო დღესასწაულთან დაკავშირებით, მოვაჭრეებს ქუჩაში ვაჭრობის ნება შვიდ მაისამდე დართეს.

ბორჯომში გარევაჭრობის აკრძალვის გადაწყვეტილება მუნიციპალიტეტის საკრებულომ 19 აპრილის #39 განკარგულების საფუძველზე მიიღო.

”ქალაქ ბორჯომში, საზოგადოებრივი თავშეყრის ადგილებში მასიური ხასიათი მიიღო უკანონო გარევაჭრობამ. გარევაჭრობის ადგილებში პროდუქციის რეალიზაცია ხდება სანიტარულ-ჰიგიენური ნორმებისა და წესების დარღვევით. კერძოდ, არ არის დაცული სანიტარული პირობები, დაბინძურებულია მტვრითა და ავტომანქანის გამონაბოლქვი გაზებით. განსაკუთრებით არადამაკმაყოფილებელი მდგომარეობაა რუსთაველის მოედნისა და მესხეთის ქუჩის მიმდებარედ, საქონლით ვაჭრობა ხდება მწყობრიდან გამოსული ავტომანქანებიდან და უსახური დახლებიდან, რაც აუარესებს ქალაქის იერსახეს, გარევაჭრობის გამო იქმნება ინფექციური დაავადებების რეალური გავრცელების საფრთხე, საკურორტო სეზონის მოახლოებასთან ერთად”, - აღნიშნულია განკარგულებაში.

ამ გადაწყვეტილებას გარემოვაჭრეები არ ეთანხმებოდნენ, თუმცა ტერიტორიის დატოვება მაინც მოუწიათ. მათი ნაწილი ბორჯომის აგრარულ ბაზარში უკვე გადავიდა.

[თინათინ ზაზაძე, ბორჯომი]