ბორჯომში გარევაჭრობა შვიდ მაისამდე აღარ აიკრძალება

მუნიციპალიტეტის საკრებულოს გადაწყვეტილებით ქალაქის ქუჩებში ყოველგვარი პროდუქტის გაყიდვა პირველი მაისიდან უნდა აკრძალულიყო. თუმცა, საკრებულოს თავმჯდომარის ბესიკ ქურდაძის გადაწყვეტილებით სააღდგომო დღესასწაულთან დაკავშირებით გარევაჭრობა შვიდ მაისამდე არ აიკრძალება.

- ”შვიდი მაისის შემდეგ გარემოვაჭრეებს ბორჯომის აგრარულ ბაზარში გადასვლა მოუწევთ”, - განაცხადა სატელეფონი საუბარში საკრებულოს თავმჯდომარემ ბესიკ ქურდაძემ.

შეგახსენებთ, რომ ბორჯომის მუნიციპალიტეტის საკრებულომ 19 აპრილს განკარგულება გასცა (#39), რომლის თანახმადაც 2013 წლის 1 მაისიდან ქალაქში გარევაჭრობა უნდა აკრძალულიყო.

- ”ქალაქ ბორჯომში, საზოგადოებრივი თავშეყრის ადგილებში მასიური ხასიათი მიიღო უკანონო გარევაჭრობამ. გარევაჭრობის ადგილებში პროდუქციის რეალიზაცია ხდება სანიტარულ-ჰიგიენური ნორმებისა და წესების დარღვევით, კერძოდ არ არის დაცული სანიტარული პირობები, დაბინძურებულია მტვრითა და ავტომანქანის გამონაბოლქვი გაზებთ. განსაკუთრებით არადამაკმაყოფილებელი მდგომარეობაა რუსთაველის მოედნისა და მესხეთის ქუჩის მიმდებარედ, საქონლით ვაჭრობა ხდება მწყობრიდან გამოსული ავტომანქანებიდან და უსახური დახლებიდან, რაც აუარესებს ქალაქის იერსახეს, გარევაჭრობის გამო იქმნება ინფექციური დაავადებების რეალური გავრცელების საფრთხე, საკურორტო სეზონის მოახლოებასთან ერთად”, - აღნიშნულია განკარგულებაში.

ამ გადაწყვეტილებას გარემოვაჭრეები არ ეთანხმებიან. ამბობენ, რომ ქალაქის ცენტრიდან რუსთაველისა და მესხეთის ქუჩების მიმდებარე ტერიტორიის დატოვება და ბორჯომის აგრარულ ბაზარში გადასვლა არ სურთ. მათი თქმით, ახალ ბაზარში სავაჭროდ არავინ დადის, რადგან ქალაქის ცენტრიდან ძალიან შორსაა. გარემოვაჭრეები ამბობენ, რომ ახალ ბაზარში ყოველდღიურად იმდენი შემოსავალი არ ექნებათ, რომ დაქირავებული ფართის საფასური გადაიხადონ.

[თინათინ ზაზაძე, ბორჯომი]