ახალციხის ცენტრალურ ქუჩებში გარევაჭრობა აიკრძალება

ახალციხის მერის ვლადიმერ ზედგინიძის განმარტებით, ის მეწარმეები, რომლებსაც სავაჭრო დახლები ქუჩებში უდგათ, ერთი კვირის წინ გააფრთხილეს: „ეს ყველაფერი ხანდახან მოსახლეობის აგრესიას იწვევს, თუმცა სხვა გზა არ გვაქვს“.

ქალაქის მერის განმარტებით, მეწარმეებმა დახლები უნდა აიღონ და პროდუქში მაღაზიებში შეიტანონ: „ივერიელის ქუჩაზე მოძრაობა ცალმხრივი გავხადეთ, ქალბატონს იმდენი რამ აქვს გამოტანილი,მთელი ქუჩა აქვს გადაკეტილი. ყველამ უნდა შეიტანოს მაღაზიაში, წინააღმდეგ შემთხვევაში დაჯარიმდებიან“.

ადგილობრივ თვითმმართველობაში განმარტავენ, რომ თუ მოვაჭრეები ამ მოთხოვნებს არ შეასრულებენ, პირველ ეტაპზე 300 ლარამდე თანხით დაჯარიმდებიან: „დარწმუნებული ვარ, რომ მოგვარდება ეს საკითხი და ჩვენი მოქალაქეები გაითვალისწინებენ. მზესუმზირას რომ ყიდიან პარკის მიმდებარე ტერიტორიაზე, ვერ ავუდივართ აწმენდას. ვიცით, რომ მათ უჭირთ, მაგრამ ჩვენც რა ვქნათ?!“

შეგახსენებთ, რომ გარევაჭრობა ქვეყნის მასშტაბით რამდენიმე ქალაქში აიკრძალა. თბილისში მეტროსადგურების მიმდებარე ტერიტორიები დახლებისგან უკვე გაწმენდილია. მოვაჭრეების დახლები აიღებს ბორჯომშიც, ცენტრალური პარკის მიმდებარე ტერიტორიიდან.



[თინათინ ზაზაძე, ახალციხე]