შშმ პირთა მხარდაჭერისთვის ახალციხეში ფესტივალი გაიმართა [Photo]

ფესტივალი, სახელწოდებით, "იცხოვრე ჩვენთან ერთად, გაერთე ჩვენთან ერთად" 7 ოქტომბერს, ახალციხის ციხეზე გაიმართა. შშმ პირებმა მაყურებელს რამდენიმე საკონცერტო ნომერი აჩვენეს. გარდა ამისა, ფესტივალში მონაწილეობა სამცხე–ჯავახეთში არსებულმა ქორეოგრაფიულმა და ფოლკლორულმა ანსამბლებმა მიიღეს. სასიმღერო და საცეკვაო ნომრები წარმოადგინეს პოლონეთიდან ჩამოსულმა ანსამბლებმაც.

საზეიმო კონცერტის პარალელურად, ფესტივალის ფარგლებში შშმ პირთა ნამუშევრების გამოფენა-გაყიდვა, მასტერკლასები და საინფორმაციო კამპანია გაიმართა.

ფესტივალის მიზანს შშმ პირთა საზოგადოებაში ინტეგრაციის ხელშეწყობა წარმოადგენდა. სწორედ ამიტომ ღონისძიებაზე ინკლუზიური სკოლების, სარეაბილიტაციო და საინტეგრაციო ცენტრების აღსაზრდელებიც იმყოფებოდნენ.

ფესტივალისთვის ახალციხეში ჩამოვიდა პოლონეთის რესპუბლიკის საგანგებო და სრულუფლებიანი ელჩი საქართველოში მარიუშ მაშკიევიჩი. ღონისძიებას ახალციხის მერი, ადგილობრივი თვითმმართველობისა და ახალციხის ციხის ადმინისტრაციის წარმომადგენლებიც დაესწრნენ.

ახალციხის ციხეზე ღონისძიება პოლონეთის საგარეო საქმეთა სამინისტროს დაფინანსებით მოეწყო. მას კოორდინირება "ავადმყოფთა მომსახურე სასულიერო პირთა ორდენის, (კამილიელების) ფილიალმა" გაუწია.















[თაკო ფეიქრიშვილი, ახალციხე]