‘გვინდა საზოგადოებამ დაინახოს რა ნიჭიერი ადამიანები არიან’, – შშმ პირთა მხარდამჭერი ფესტივალი ახალციხეში [photos]

შშმ პირთა მხარდამჭერი ფესტივალი "იცხოვრე ჩვენთან ერთად, გაერთე ჩვენთან ერთად!" – პროექტის "ბედნიერები ერთად" ფარგლებში ჩატარდა. აღნიშნული პროექტი, პოლონეთის საგარეო საქმეთა სამინისტროს მხარდაჭერით ხორციელდება და მიზნად ისახავს სამცხე-ჯავახეთის რეგიონში, შშმ პირთათვის აქტუალურ საკითხებზე საზოგადოების ცნობიერების ამაღლებას.

"შშმ პირი არ არსებობს. შესაძლებლობები გვაქვს ან არ გვაქვს. შეიძლება ითქვას, რომ ჩვენი ბენეფიციარები ხშირ შემთხვევაში ჩვენზე უფრო ჭკვიანები და ნიჭიერები არიან. ეს ფესტივალი არის საშუალება, რომ ყველამ დაინახოს განსაკუთრებით ახალციხის საზოგადოებამ რა ნიჭიერი ადამიანები ცხოვრობენ აქ", – განაცხადა მამა პავლე დიმმა.

მისი თქმით, ახალციხეში, ამ ეტაპზე, 25 ბენეფიციარი ჰყავთ. მომავალში, დღის ცენტრისთვის ახალი შენობის აშენებაც იგეგმება: "ჩვენი დები – მონაზვნები საქართველოში მუშაობენ სნეულთა კეთილდღეობისათვის. ჩვენი მიზანია, დავინახოთ ყველას სნეულში იესო ქროსტე და ვემსახუროთ მას. ახალციხეში უკვე რამდენიმე წელია ვმოღვაწეობთ, გვაქვს სურვილი მომავალში აქ ავაშენოთ დიდი ცენტრი, იმიტომ, რომ ის შენობა რაც გვაქვს, პატარაა და ბევრია საჭიროება".

დღევანდელ ფესტივალს პოლონეთის რესპუბლიკის საგანგებო და სრულუფლებიანი ელჩი საქართველოში მარიუშ მაშკიევიჩი, ვატიკანის ელჩი ჟოზე აველინო ბეტანკური და ადგილობრივი თვითმმართველობის წარმომადგენლები ესწრებოდნენ.

შშმ პირებმა მაყურებელს რამდენიმე საკონცერტო ნომერი აჩვენეს. გარდა ამისა, ფესტივალში მონაწილეობა სამცხე–ჯავახეთში არსებულმა ქორეოგრაფიულმა და ფოლკლორულმა ანსამბლებმა მიიღეს.

პარალელურად, ციხის ტერიტორიაზე შშმ პირთა ნამუშევრების გამოფენა – გაყიდვა გაიმართა. მსურველებს შეეძლოთ მეშვიდე საჯარო სკოლის მოსწავლეების, ასევე ასპინძის საინტეგრაციო ცენტრის და "ტალიტა კუმის" ბენეფიციარების ნამუშევრები შეეძინათ.













[თინათინ ზაზაძე, ახალციხე]