ახალციხეში სკოლის აფეთქება სცადეს?

მეხუთე საჯარო სკოლის მოსწავლეების გადმოცემით, დღეს დილით 11:00 საათისთვის, სკოლის მიმდებარე ტერიტორიაზე დაახლოებით 22-23 წლის ბიჭი დააკავეს. მას ხელში ასაფეთქებელი მოწყობილობა ხელყუმბარა ეკავა და სკოლის აფეთქებით იმუქრებოდა.

- „მეორე გაკვეთილი გვქონდა, დავინახე როგორ მორბოდა ბიჭი, ხელში „ლიმონკა“ ეკავა და პოლიციას ეუბნებოდა, არ მომეკაროთ, თორემ სკოლას ავაფეთქებო, პოლიციამ „ლიმონკა“ ხელიდან გამოგლიჯა და მაშინვე დააკავა, როგორც ვიცი შემდეგ მისი საცხოვრებელი ბინაც გაჩხრიკეს“, - გვიყვება ერთ-ერთი მეათე კლასის მოსწავლე, რომელიც მომხდარს გაკვეთილის მიმდინარეობისას საკლასო ოთახიდან უყურებდა.

იმავეს იმეორებენ „სამხრეთის კარიბჭესთან“ საუბარში მე-3, მე-9 და მე-12 კლასის მოსწავლეებიც: „სკოლის აფეთქებით იმუქრებოდა, პოლიცია მოვიდა და მალევე დააკავა“.

ახალციხის მეხუთე საჯარო სკოლის დირექტორის მოადგილის ნანა დათაშვილის განცხადებით, მომხდარს სკოლასთან არანაირი კავშირი არ ჰქონია: „როგორც სკოლის დაცვის ბიჭებმა მითხრეს, დაკავებული უბრალოდ მეხუთე სკოლასთან ცხოვრობს, თორემ მას სკოლასთან არანაირი კავშირი არ ჰქონია. თქვეს ისიც, რომ მეხუთე სკოლას საფრთხე ემუქრებოდა. მეტი არაფერი ვიცი. არც ის ვიცი ის ბიჭი რატომ დააკავეს“.

მომხდარის შესახებ მიმდინარეობს გამოძიება.

[თამუნა უჩიძე, ახალციხე]