26 სექტემბრის მდგომარეობით, სამცხე–ჯავახეთში ხანძრის სამი კერა რჩება

მეოთხე დღეა ცეცხლის ლოკალიზება ვერ ხერხდება ასპინძა–ბორჯომის მონაკვეთზე, კოდიანის ტყეში. სამაშვებლო ოპერაციაში, დღეს, 26 სექტემბერს, დილიდან, ორი: თურქული და აზერბაიჯანული ვერტმფრენი და შსს–ს განსაკუთრებულ დავალებათა დეპარტამენტის 150 თანამშრომელი ჩაერთო. ადგილზე სულ 200–ზე მეტი ცოცხალი ძალა მუშაობს, მძიმე ტექნიკის მიყვანა კი, მიუვალი ადგილის გამო, ისევ ვერ ხერხდება.

საგანგებო სიტუაციების მართვის სამსახურის ბოლო ინფორმაციით, ბორჯომში, წაღვერის ტყეში სალიკვიდაციო სამუშაოები მიმდინარეობს. კერების დამუშავებას სახანძრო ტექნიკა ადგილზე ახდენს, რადგან მისასვლელი გზები უკვე გაჭრილია. უწყებაში განმარტავენ, რომ სალიკვიდაციო სამუშაოების სწრაფად დასრულებისათვის ქართული და თურქული ვერტმფრენებიც არიან ჩართულნი.

ხანძრის კერების სალიკვიდაციო სამუშაოები მიმდინარეობს ადიგენში, ღაღვის ტყეშიც. მიუვალი ადგილის გამო, გზის გაჭრა აქაც გახდა საჭირო. ამ დროისათვის ადგილზე ტექნიკასთან ერთად, ცოცხალი ძალა ალტერნატიული ცეცხლმაქრებით მუშაობს.

შეგახსენებთ, რომ ცეცხლის ქრობის სამუშაოები წაღვერისა და ღაღვის ტყეში უკვე მეექვსე დღეა მიმდინარეობს, ხოლო კოდიანის ტყეში მეხუთე.

[ლუბა გიორგაძე, ბოორჯომი]