ახალციხეში ბერი ნიკოლოზის მხარდასაჭერად ხელმოწერები გროვდება

ადგილობრივი ზაზა სუდაძე და ბერი ნიკოლოზის მრევლი ოლღა გაბედავა, თითქმის ორი კვირაა რაც ახალციხეში, ქალაქის ცენტრში ხელმოწერებს აგროვებენ.

„22 წლის უკან, მამა გაბრიელთან მოღვაწეობის დროს, მან აკურთხა შიმშილობისთვის. მარხვიდან 50 დღე იყო გასული, რომ მასთან საპატრიარქოდან მისულმა ერთ–ერთმა იარარქმა უთხრა, რომ ეს შიმშილობა შეეწყვიტა, სწორედ ეს ჩაეთვალა იერარქიის ურჩობაში და შეუჩერეს მღვდელმსახურება“, – ამბობს ბერი ნიკოლოზის მრევლი ოლღა გაბედავა.

მისივე თქმით, ხელმოწერების შეგროვება ერთი მიზეზის გამო დაიწყეს.

„ჩვენი წარმომადგენლები იყვნენ საპატრიარქოში ბერი ნიკოლოზისთვის მღვდელმსახურების აღსადგენად, როგორც ვიცი პატრიარქმა თქვა, თუ ხალხის ნება იქნება აღვადგენთო, ამიტომ გადავწყვიტეთ 100 000 ხემოლმოწერის შეგროვება. მე როგორც ვიცი 100 000 ხელმოწერით შესაძლებელია ეპისკოპოსის არჩევაც კი“, – ამბობს ოლღა გაბედავა.

როგორც ბერი ნიკოლოზის მრევლი აცხადებს, ხელმოწერების უმეტესობა შეგროვდა: „90 000 ხელმოწერა გვაქვს უკვე“.

სულ სხვა ვერსიაზე საუბრობენ სასულიერო პირები ახალციხეში. დეკანოზი იოანეს განმარტებით , ბერ ნიკოლოზს მღვდელმსახურება ფსიქიკური ჯანმრთელობის გამო შეუჩერდა და არა სხვა რამის გამო. იმ პირების საქციელი კი, რომლებიც მოსახლეობას ბერ ნიკოლოზის მრევლად ეცნობიან, არის არასწორი.

„შეჩერებული აქვს ღვთისმსახურება, ჯანმრთელობის პრობლემების გამო. მრევლი აკეთებს ხელმოწერებს, მაგრამ ეს არასწორი საქციელია, იმიტომ რომ ეს არის ეკლესიის გადასაწყვეტი და არა ხალხის. დაუდგენენ მხარში მოუწესრიგდეს ჯანმრთელობა და შემდეგ აღადგენენ ეკლესიაში“, – განაცხადა სატელეფონო საუბარში ივლიტის ეკლესიის წინამძღვარმა.

ბერ ნიკოლოზთან დაკავშირებით განცხადება გავრცელებული აქვს საქართველოს საპატრიარქოს.

„ბერ ნიკოლოზ მაქარაშვილს თითქმის 20 წელია ჯანმრთელობასთან დაკავშირებული მიზეზების გამო შეჩერებული აქვს მღვდელმსახურება და მისი ფოტოებს ტექსტით „მხსნელი“ და „გადამრჩენელი“ ეკლესია არ ავრცელებს, – მის შესახებ საპატრიარქოს განცხადებაშია ნათქვამი.

“საზოგადოებრივი თავშეყრის ადგილებში, ტრანსპორტში, განსაკუთრებით კი სამკურნალო დაწესებულებებში ეკლესიის სახელით ვრცელდება ბერი ნიკოლოზის (მაქარაშვილი) ფოტოები ასეთი ტექსტებით: “მხსნელი”, “გადამრჩენელი” და ა.შ.

გვინდა განვმარტოთ, რომ ბერ ნიკოლოზს თითქმის 20 წელია ჯანმრთელობასთან დაკავშირებული გარკვეული მიზეზების გამო შეჩერებული აქვს მღვდელმსახურება”, – ნათქვამია საპატრიარქოს განცხადებაში, რომელიც გასული წლის იანვარში გამოქვეყნდა.

[თინათინ ზაზაძე, ახალციხე]