ახალციხეში თეატრების ხელმძღვანელები შეირჩა

მესხეთის დრამატულ თეატრის სამხატვრო ხელმძღვანელის პოსტს კვლავ ლია სულუაშვილი დაიკავებს, ხოლო თოჯინებით თეატრს ვახტანგ ქორიძე უხელმძღვანელებს.

ლია სულუაშვილსაც და ვახტან ქორიძესაც სამხატვრო ხელმძღვანელის პოსტი ოთხი წლის განმავლობაში ეკავათ, პროფესიული თეატრების სამხატვრო ხელმძღვანელობის კანდიდატთა შესარჩევმა სარეკომენდაციო საბჭომ ისინი კონკურსის შედეგად ისევ შეარჩია.

კანდიდატების ოთხწლიანი სამუსაო ვადის ათვლა დღეიდან, 5 სექტემბრიდან დაიწყო.

სამხატვრო ხელმძღვანელი ვახტანგ ქორიძე ახალციხის თოჯინების თეატრში არაერთი აქტივობის განხროციელებას გეგმავს.

„დაიდგმება ახალი სპექტაკლები, ძველების კი განახლდება. მინდა ჩვენი თეატრი საბავშვო კულუტრული ცენტრი იყოს. იქნება სპეციალური კუთხე, სადაც პატარებს შეეძლებათ დახატონ. მოეწყობა საგამოფენო სივრცე, შთაბეჭდილებების წიგნი“, – ამბობს იგი.

15 სექტემბრიდან შეუდგება მუშაობას მესხეთის დრამატული თეატრის სამხატვრო ხელმძღვანელი ლია სულუაშვილი. იგი ამჟამად შვებულებაში იმყოფება.

„ოთხი წლის განმავლობაში საზღვარგარეთ დასის გასტროლებზე წაყვანას ვგეგმავ. ასევე მოვიწვევთ უცხოელ რეჟისორებს. აქტიურად ჩავერთვებით ეროვნული დრამატურგიის ფესტივალში, რომლის ერთ–ერთი დამფუძნებელი მეც ვარ“, – ამბობს სულუაშვილი.

შეგახსენებთ, რომ სამინისტროს დაქვემდებარებაში შემავალი, პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევი კონკურსი, 24 ივლისს გამოცხადდა. ხელმძღვანელი პირები, კონკურსის წესით, სულ 23 დაწესებულებაში შეირჩა.

[თინათინ ზაზაძე, ახალციხე]