ახალციხის თეატრებში სამხატვრო ხელმძღვანელებს კონკურსით შეარჩევენ

სამინისტროს დაქვემდებარებაში შემავალი, პროფესიული სახელმწიფო თეატრების სამხატვრო ხელმძღვანელების კანდიდატთა შესარჩევი კონკურსი, დღეს, 24 ივლისს გამოცხადდა.

ხელმძღვანელი პირები, კონკურსის წესით, სულ 23 დაწესებულებაში შეირჩევა. მათ რიცხვში მოხვდა მესხეთის სახელმწიფო დრამატული თეატარი და ახალციხის თოჯინების თეატრი. მათ სამხატვრო ხელმძღვანელებს უფლებამოსილების ვადა სექტემბერში ამოეწურებათ.
მიიღებს თუ არა კონკურსში მონაწილეობას მესხეთი სახელმწიფო თეატრის სამხატვრო ხელმძღვანელი, ლია სულუაშვილი, ამ ეტაპზე ვერ აკონკრეტებს.

„ვნახოთ, ჯერ ვფიქრობ. ჯერ კიდევ თავს ვიკავებ, თვის ბოლოს მეცოდინება“, – განმარტავს იგი.

რაც შეეხება ახალციხის თოჯინების თეატრს, მისი დირექტორი რუსუდან სისაური ამბობს, რომ მათ ამჟამად მოქმედი სამხატვრო ხელმძღვანელის დატოვება სურთ და ამის შესახებ სამინისტროს აცნობეს კიდეც.

„გვაქვს უფლება, კოლექტივმა თავისი წინადადებით მიმართოს სამინისტროს, ამიტომ ჩვენ ისევ ჩვენი სამხატვრო ხელმძღვანელი, ვახტანგ ქორიძე წარვადგინეთ. სხვა ვის აქვს სურვილი, რომ კონკურსში მიიღოს მონაწილეობა, შემდეგ გამოჩნდება“, – ამბობს რუსუდან სისაური.

სამხატვრო ხელმძღვანელების შესარჩევი კონკურსის გამოცხადების შესახებ დღეს, 24 ივლისს კულტურის სამინისტროში პრესკონფერენცია გაიმართა. ღონისძიებას საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი და კულტურის სამინისტროს წარმომადგენელი ზაზა სოფრომაძე უძღვებოდნენ.

მათი ინფორმაციით, სამხატვრო ხელმძღვანელების კანდიდატურებს მინისტრს დასამტკიცებლად „პროფესიული თეატრების სამხატვრო ხელმძღვანელობის კანდიდატთა შესარჩევი სარეკომენდაციო საბჭო“ წარუდგენს. საბჭოს შემადგენლობაში არიან: მანანა ანთაძე, თამარ ბოკუჩავა, დავით ბუხრიკიძე, ლელა ოჩიაური, ნინო ხურცილავა, ვასილ ჯანიკაშვილი.

სამხატვრო ხელმძღვანელების შერჩევა მოხდება საბჭოს მიერ, კონკურსის წესით. საკონკურსო დოკუმენტაცია 2017 წლის 14 აგვისტოს 17:00 საათამდე მიიღება, საქართველოს კულტურისა და ძეგლთა დაცვის სამინისტროში.



[თაკო ფეიქრიშვილი, ახალციხე]