სამცხე-ჯავახეთს სომხეთის ელჩი ესტუმრა

24 აპრილს ”სომეხთა გენოციდიდან” 98 წელი სრულდება. ამ დღის აღნიშვნა სამცხე-ჯავახეთში მცხოვრებმა სომხური ეროვნების მოქალაქეებმა დღეიდან დაიწყეს.

ახალციხის დემოკრატიული ჩართულობის ცენტრში სომხური ახალგაზრდული კავშირი ”ხიდის” ორგანიზებით მეოცე საუკუნის პირველი გენოციდისადმი მიძღვნილი ფოტოგამოფენა მოეწყო. გამოფენაზე ადგილობრივი ხელისუფლების წარმომადგენლებიც იმყოფებოდნენ. ფოტოგამოფენა სომხეთის ელჩმა საქართველოში ოვანეს მანუკიანმაც მოინახულა.

”სომეხ ერს სურს, რომ ცივილიზებულმა სამყარომ აღიაროს ეს ფაქტი, რადგან ეს მათი მორალური ვალია. გენოციდი ეს საშინელი დანაშაულია კაცობრიობის წინაშე და დანაშაული, რომელიც არ ძველდება. მიუხედავად იმისა, თუ რამდენი დროა მას შემდეგ გასული. ამიტომ, სომეხი ერი ყოველ წელს მიიჩნევს ამ მიმართულებით საკუთარი ვალი მოიხადოს”, - ამბობს სომხეთის ელჩი საქართველოში.

მისივე თქმით, ისტორია გვაჩვენებს, რომ ასეთი საშინელი დანაშაულის არ აღიარებამ შესაძლოა მის განმეორებამდე მიგვიყვანოს.

”ამიტომ ძალიან მნიშვნელოვანია პოლიტიკური და იურიდიული კუთხით, რომ ეს ფაქტი აღიარებული იყოს. რადგან კაცობრიობა აღარ დადგეს პირისპირ ასეთი საშინელი ფაქტის წინაშე”, - ამბობს ოვანეს მანუკიანი.

1915 წლის 24 აპრილს ოსმალეთის იმპერიის მიერ სომეხი მოსახლეობის გენოციდი განხორციელდა. გენოციდის შედეგად ორ მილიონამდე სომეხი დაიღუპა. ამიტომ 24 აპრილი სომეხი ერისთვის გლოვის დღეა და 1915 წელს დაღუპული ადამიანების ხსოვნის პატივსაცემად სხვადასხვა ღონისძიებებს მართავენ.

დღეს საღამოს, რვა საათზე ახალციხეში მცხოვრები ეროვნებით სომეხი მოქალაქეები გენოციდის მსხვერპლთა მემორიალთან შეიკრიბებიან.


[თამარ თოთაძე, ახალციხე]