შს მინისტრი: აბასთუმნის ხანძრის მასშტაბი ბორჯომზე ბევრად ნაკლებია

"დღის ბოლოსთვის მეხანძრე–მაშველები, ასევე, განსაკუთრებულ დავალებათა დეპარტამენტის პირადი შემადგენლობა, ძირითადი შემადგენლობა ტყიდან გამოგვყავს, ბინდდება უკვე, მაგრამ, მიუხედავად ამისა, მორიგე ჯგუფები ადგილზე რჩებიან მცირე რაოდენობით იმისთვის, რომ 24–საათიანი მორიგეობა იყოს. მოგეხსენებათ, რელიეფი ძალიან რთულია და ღამე ცოცხალ ძალასაც უჭირს იქ მუშაობა. მიუხედავად ამისა, ჩვენ მაინც ვტოვებთ გარკვეულ ძალას, რათა არ მოხდეს ხანძრის გავრცელება", – განაცხადა მინისტრმა ჟურნალისტებთან დღის შეჯამებისას.

მისივე განცხადებით, დღეს, აბასთუმანში, სტიქიის ზონაში დღის განმავლობაში ორმა ქართულმა ვერტმფრენმა (აქედან ერთი შსს–ს და ერთი კერძო კომპანიის ვერტმფრენია) იმუშავა, ასევე დღის მეორე ნახევარში ავიაციას დაემატა უკრაინული თვითმფრინავი: "დღის ბოლოსთვის კიდევ შემოგვემატა აზერბაიჯანული ვეტმფრენი და ხვალ დილიდან უკვე ამას ორი თურქული ვეტმფრენიც დაემატება და პლიუს ერთი თურქული თვითმფრინავი. ანუ, ხვალ დილიდან ისევ ახალი ძალებით განვაახლებთ ხანძრის ქრობის პროცესს“.

მინისტრის ამბობს, რომ აბასთუმანში სიტუაციას აკონტროლებენ და ეს რამე განსაკუთრებული შემთხვევა არ არის: "კიდევ ერთხელ შემიძლია შევადარო წაღვერის და დაბის ხანძარს, იმათთან შედარებით არც შეიძლება, რომ ახლოს დავაყენოთ, ამ ხანძრის მასშტაბები ბევრად უფრო ნაკლებია. აქედან გამომდინარე იმედი მაქვს, რომ ბევრად უფრო ადრე მოხდება ამ ხანძრის ლოკალიზება და ლიკვიდაცია ვიდრე წაღვერის და დაბის“.

ამ ეტაპზე მინისტრი ისევ ვერ საუბრობს დამწვარი ტყის ფართობზე. მისი განცხადებით, ეს ხანძრის სრული ლიკვიდაციის შემდგომ იქნება ცნობილი.

კითხვაზე, კიდევ იჭრება თუ არა ტყეში გზა, მინიტრი პასუხიბს, რომ წუხელ 5 კილომეტრამდე გაიჭრა გზა, დღეს კიდევ დაემატა ერთი კილომეტრი და თუ ამის აუცილებლობა იქნა, მძიმე ტექნიკა რჩება ადგილზე და ახალ გზებს გაიყვანენ.

რაც შეეხება ირანის ავიაციას, მინისტრის თქმით, შესაძლოა მისი დახმარება საჭირო არ გახდეს, თუმცა მოლაპარაკებები მიმდინარეობს: "ის ავიაცია რაც ჩამოგითვალეთ, მე ვფიქრობ რომ საკმარისი იქნება".

მინისტრი აცხადებს, რომ ის ძალა რაც ხეობაში რჩება, საკმარისია იმისთვის, რომ ხანძარს მოერიოს.

[sknews.ge]