სოფელ ურაველთან, ფერდობზე, ბუჩქნარი იწვის

ხანძრის შესახებ ინფორმაციას ადასტურებენ ახალციხის მუნიციპალიტეტის გამგეობაში და საგანგებო სიტუციების სამსახურში.

"სამხრეთის კარიბჭე" ერთ–ერთ ადგილობრივს ესაუბრა, რომლის თქმით, ცეცხლი სოფლის გარეთ, ფერდობზეა გავრცელებული და ჯერ ლოკალიზებული არ არის.

ახალციხის მუნიციპალიტეტის საკრებულოს თავმჯდომარის თქმით, ცეცხლი ყოფილი კომენდატურის მოპიდაპირე მხარეს, ბუჩქნარს უკიდია. ადგილი მიუდგომელია და მეხანძრე–მაშველები და ადგილობრივები ცდილობენ მის ჩაქრობას: "ერთ მხარეს უკვე შევძელით ლოკალიზება, მეორე მხარეს რა ხდება ვერ გეტყვით, ვფიქრობ, იქაც შეძლეს მეხანძრეებმა. მანქანა ვერ მიდის, მეხანძრეები მუშაობენ".

მისივე ინფორმაციით, ხანძარი დაახლოებით 2 ჰექტარ ფართობზეა გავრცელებული.

"თვალის ზომით, დაახლოებით, ასეა. ჯერ ზუსტ მონაცემს ვერ გეტყვით", – განაცხადა გელა ნოზაძემ სატელეფონო საუბარში.

[ნინო ნარიმანიშვილი, ახალციხე]