14 მუნიციპალიტეტის გაერთიანება არსებითად ზღუდავს თვითმმართველობის უფლებას - ISFED

ანგარიშის მიხედვით, 2014 წელს ადგილობრივი თვითმმართველობის რეფორმის ფარგლებში თვითმმართველობის განვითარებისა და დეცენტრალიზაციის კუთხით ერთ-ერთ მნიშვნელოვან და ხელშესახებ სიახლეს წარმოადგენდა მუნიციპალიტეტების გაყოფა და 7 ახალი თვითმმართველი ქალაქის შექმნა. ეს იყო რეფორმის მხოლოდ პირველი ეტაპი და აღნიშნული პროცესი უნდა გაგრძელებულიყო, რისი მოლოდინიც იყო საზოგადოებაში, რომ ტერიტორიული ოპტიმიზაცია სხვა მუნიციპალიტეტებსაც შეხებოდა. ამის სანაცვლოდ, 2017 წელს საკონსტიტუციო კომისიის მუშაობის პარალელურად, საზოგადოებისთვის მოულოდნელად, ცნობილი გახდა, რომ ხელისუფლებაში განიხილებოდა 2014 წელს გაყოფილი მუნიციპალიტეტების გაერთიანებისა და 7 მუნიციპალიტეტისთვის თვითმმართველი ქალაქის სტატუსის გაუქმების საკითხი.

"საქართველოს რეგიონული განვითარებისა და ინფრასტრუქტურის სამინისტრომ, საზოგადოებასთან კონსულტაციის გარეშე, მოამზადა და შესაბამის მუნიციპალიტეტებში გადააგზავნა საკანონმდებლო ინიციატივა, რომელიც 14 მუნიციპალიტეტის (მათ შორის, 7 თვითმმართველი ქალაქის) გაუქმებასა და კვლავ 2014 წლამდე არსებული ტერიტორიული მოწყობის აღდგენას ითვალისწინებდა. არასამთავრობო ორგანიზაციების არაერთ მოწოდებას, რომ აღნიშულ საკითხზე საგნობრივი დისკუსია ფართო საზოგადოების ჩართულობით გამართულიყო, ხელისუფლების მხრიდან რეაგირება არ მოყოლია. სამოქალაქო საზოგადოების, მოქალაქეების და ოპოზიციური პარტიების წინააღმდეგობის და მოწოდებების მიუხედავად ყველა შესაბამისი მუნიციპალიტეტის საკრებულომ განიხილა და მოიწონა სამინისტროს მიერ მომზადებული ინიციატივა მუნიციპალიტეტების კვლავ გაერთიანების და თვითმმართველი ქალაქის სტატუსის გაუქმების შესახებ. რიგ შემთხვევებში გადაწყვეტილების მიღება ხმაურის და დაპირისპირების ფონზე მიმდინარეობდა", – ვკითხულობთ ანგარიში.

2017 წლის 30 ივნისს საქართველოს პარლამენტმა, მიუხედავად ფართო საზოგადოების წინააღმდეგობისა, მხარი დაუჭირა 7 თვითმმართველი ქალაქის სტატუსის გაუქმებას და მუნიციპალიტეტების გაერთიანებას. 21 ივლისს პრეზიდენტმა ვეტო დაადო კანონპროექტს და მოტივირებული შენიშვნებით დაუბრუნა საქართველოს პარლამენტს. 26 ივლისს პარლამენტმა დაძლია პრეზიდენტის ვეტო, რაც იმას ნიშნავს, რომ აღნიშნული ცვლილება ძალაში შევა.

"2017 წლის თვითმმართველობის არჩევნების შემდეგ 14 თვითმმართველი ერთეული გაერთიანდება და თვითმმართველი ქალაქის სტატუსს მხოლოდ 5 ქალაქი შეინარჩუნებს. აღნიშნული გადაწყვეტილება არსებითად ზღუდავს თვითმმართველობის უფლების როგორც 7 ქალაქისთვის, ისე თვითმმართველ თემში შემავალი სოფლებისთვის", – ნათქვამია ორგანიზაციის ანგარიშში.

[ნინო ნარიმანიშვილი, ახალციხე]