ნინოწმინდაში 53 წლის მამაკაცს ტრაქტორმა გადაუარა

ნინოწმინდის რადიო "ნორის" ინფორმაციით, შემთხვევა სოფელში გუშინ, 13 აგვისტოს, საღამოს მოხდა. როგორც რადიოს კორესპონდენტი გვიყვება, სოფელში მომხდარის ორ ვერსიაზე საუბრობენ.

ერთი ვერსიით, მამაკაცი მისივე ტრაქტორით მინდორში მუშაობდა, შემდეგ შეისვენა, ტრაქტორიდან დაახლოებით ათიოდე მეტრში წამოწვა და ჩაეძინა. ამ დროს კი ტრაქტორი დაგორდა და გადაუარა.

მეორე ვერსიით, ტრაქტორი მწყობრიდან გამოვიდა, მამაკაცი მის შეკეთებას ცდილობდა, აწვებოდა, რომ დაქოქილიყო და ტრაქტორმა მას ამ დროს გადაუარა.

შემთხვევის შედეგად მამაკაცი ადგილზე გარდაიცვალა, ტრაქტორი კი დაგორდა და ამოტრიალდა.

გარდაცვლილი ამავე სოფლის, კატნატუს მცხოვრებია.

შინაგან საქმეთა სამინისტროს ცნობით, მომხდარს სისხლის სამართლის კოდექსის 276–ე მუხლის მე–5 ნაწილით იძიებენ (ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია ადამიანის სიცოცხლის მოსპობა).

[ნინო ნარიმანიშვილი, ნინოწმინდა]