ახალციხეში ორი დიდი ქართველი – მიხეილ თამარაშვილი და რეზო თაბუკაშვილი გაიხსენეს [Photos]

სპექტაკლი 5 აგვისტოს, ახალციხის ციხის ციტადელში გაიმართა. ხარაგაულის თეატრის დირექტორი და რეჟისორი იზა ვეფხვაძე, მუსიკალური გაფორმებისა და რეზო თაბუკაშვილის ცხოვრების ამსახველი ფოტოკოლაჟის ფონზე, მის ცხოვრებაზე ციტადელში შეკრებილებს ერთი საათისა და 20 წუთის განმავობაში უყვებოდა.

ლიტერატული სპექტაკლი პროექტის „ჩემი საქართველო აქ არის“ ფარგლებში გაიმართა. პროექტის ავტორი თავად იზა ვეფხვაძეა. მისი იდეაა, საქართველოს ისტორიულ რეგიონებში, ქალაქებსა და სოფლებში, დიდი ქართველები გააცოცხლონ. ახალციხემ პროექტის ფარგლებში მესამე სპექტაკლს უმასპინძლა. პირველი სპექტაკლი უფლისციხეში გაიმართა და მერაბ კოსტავას მიეძღვნა, მეორე კი გუდამაყრის ხეობაში, სადაც გოდერძი ჩოხელი გაიხსენეს.

„რეზო თაბუკაშვილის მრავალმხრივ მოღვაწეობაში და მის ღვაწლში, ერთ–ერთი გამორჩეული ღვაწლი გახლავთ მიხეილ თამარაშვილის საქართველოში ჩამოსვენება. ვინაიდან მიხეილ თამარაშვილის სამშობლოა ახალციხე, გადავწყვიტეთ, რომ რეზო თაბუკაშვილის სპექტაკლი ჩაგვეტარებინა აქ და ეს ყოფილყო ორი დიდი ქართველის გახსენების საღამო“, – ამბობს იზა ვეფხვაძე.

„თამარაშვილებს ბევრჯერ გვიოცნებია მიგვეგნო ჩვენი დიდი წინაპრის, მიხეილ თამარაშვილის საფლავისათვის. წლები გადიოდა, ოცნება ოცნებად რჩებოდა, და ეს დიდი ოცნება აგვისრულა დიდმა ქართველმა, დიდმა ერისშვილმა რეზო თაბუკაშვილმა. მან ჩამოასვენა მიხეილ თამარაშვილი და მიაბარა მშობლიურ მიწას. რომ არა რეზო თაბუკაშვილი, მიხეილის ბედი რა იქნებოდა იქ, არავინ იცის. მან მიხეილ თამარაშვილი გადაარჩინა და დაუბრუნა საქართველოს. ჩვენთვის ის უდიდესი პიროვნებაა“, – ამბობს მიხეილ თამარაშვილის შთამომავალი ანზორ თამარაშვილი.

სპექტაკლს ადგილობრივების გარდა, რომელთა შორის, ხელოვანები სჭარბობდნენ, თბილისიდან ჩამოსული 60–მდე ხელოვანი – პოეტი, მწერალი, მხატვარი და ა.შ, სამაჩაბლოდან ჩამოსული ასევე ხელოვანების 30–კაციანი დელეგაცია ესწრებოდა. საპატიო სტუმრებს შორის იყვნენ მიხეილ თამარაშვილის შთამომავლები.

„ძალიან საინტერესო პროექტია და ჩვენ, სამშობლო დაკარგულებს გვაქვს უფლება, რომ ამ პროექტში არ მივიღოთ მონაწილეობა?! რა თქმა უნდა არ გვაქვს“, – ამბობს სამაჩაბლოს დელეგაციის ერთ–ერთი ხელმძღვანელი, პოეტი ციცინო ბაბუციძე და ამატებს, რომ სამაჩაბლოს დელეგაცია ყველა სპექტაკლს დაესწრება.

იზე ვეფხვაძის თქმით, მომდევნო სპექტაკლები სამაჩაბლოს, კონფლიქტის ზონის მიდებარე სოფლებში, ასევე, ყაზბეგში, მყინვარწერის ძირში გაიმართება: „პროექტისრულიად საქართველოს მოიცავს“.

პროექტს დამფინანსებელი არ ჰყავს. იზა ვეფხვაძე ამბობს, რომ ეს მისი პირადი ინიციატივა და პროექტია და ძირითადად, კერძო შეწირულობებზე არიან დამოკიდებული: „მაგალითად, დღევანდელ დღეს ტრანსპორტირება თბილისიდან მაყურებლის და ხარაგაულიდან თეატრის, უზრუნველყო ცნობილმა საოპერო მომღერალმა, მსოფლიო ბანმა, იტალიაში მოღვაწე მამუკა ლომიძემ. კერძო ინიციატივები ჩნდება რომ ტრანსპორტირება დაფინანსდეს“.















[ნინო ნარიმანიშვილი, ახალციხე]