ოთხი თვე გამოსახლების მოლოდინში

61 წლის ნანა ნემსაძე რძალთან და მცირეწლოვან შვილიშვილთან ერთად ახალციხეში ივერიელის ქუჩაზე ყოფილი ”ტუბ-დისპანსერის” შენობაში თვითნებურად 4 ნოემბერს შევიდა. ნემსაძე ამბობს, რომ წასასვლელი არსად აქვს და გამოსახლების შემთხვევაში ქუჩაში მოუწევს ცხოვრება.

”ავადმყოფი ქალი ვარ, 1997 წლიდან ქირით ვცხოვრობთ, უამრავი ბინა გამოვიცვალეთ. უკიდურესმა გაჭირვებამ გადამაწყვეტინა ამ შენობაში შემოსვლა, - გვიყვება ნემსაძე და ამატებს, რომ მას შემდეგ რაც შენობა თივთნებურად დაიკავეს, მასთან არც გამგებელი არც გუბერნატორი და არც დეპუტატი მისულა - მათ თავად ვუთხარი, რომ შენობაში უკანონოდ შევედი. მითხრეს, თუ არავინ გაგდებთ იცხოვრეთო. ახლა კი პოლიციის თანამშრომელი მოვიდა გვითხრა გიჩივიან და თუ ნებით არ წახვალთ ძალით გაგასახლებთო”.

ნემსაძეები ახალციხეში საცხოვრებლად ბაღდადიდან 1977 წელს გადმოვიდნენ. როგორც ოჯახის უფროსმა განაცხადა მეუღლის მძიმე ავადმყოფობის გამო გაყიდა სახლი და ყველაფერი რაც გააჩნდა, მას შემდეგ ქირით ცხოვრობენ.

” ყველაფერი გავყიდე მის სამკურნალოდ, მაგრამ მაინც ვერ ვუშველეთ. ორი რკინის საწოლის გარდა არაფერი გვაქვს. თვენახევრის წინ ქონების მართვის დეპარტამენტიდან მოვიდნენ, შეამოწმეს ვიზუალურად და გვითხრეს თქვენ არაფერი დააზიანოთო და ხელი მოგვაწერინეს. სხვა არავერი უთქვამთ”, - ამბობს ნანა ნემსაძე.

სოციალურად დაუცველ ოჯახს იმის გამო, რომ საცხოვრებელ ადგილს ხშირად იცვლის დახმარება დროებით შეწყვეტილი აქვს. მათი ერთადერთი შემოსავალი პენსია და რძლის ხელფასი, 75 ლარია. როგორც ოჯახის უფროსი ამბობს უბნის ინსპექტორმა ბინის დასაცლელად ორკვირიანი ვადა მისცა.

”ვერსად ვერ წავალთ სადაც გამოყრიან ჩვენს ნივთებს იქ დავდგამთ კარავს და ვიცხოვრებთ”, - გვითხრა ნემსაძემ.

[თინათინ ზაზაძე, ახალციხე]