ტუბ–დისპანსერის შენობაში სახურავის ნაწილი ჩამოინგრა

ახალციხეში, ივერიელის N15-ში მდებარე ყოფილი ტუბ–დისპანსერის შენობის ერთ ოთახში ჭერი გვიან ღამით დაზიანდა.

„დახლოებით ღამის ორი საათი იქნებოდა, ძლიერი ხმა იყო, მეგონა სახლი თავზე დამენგრა. ძალიან შემეშინდა. შუქი არ მაქვს, სანთელი რომ ავანთე, ასე ჩამონგრეული დამხვდა“, – ამბობს ნანა ნემსაძე.

მრატოხელა პენსიონერი ოთხი წელია, ავარიულ ბინაში ცხოვრობს, ამბობს, რომ რამდენჯერმე სახურავი თავად შეაკეთა, თუმცა ძლიერმა ქარმა ისევ გადახადა.

„წასასვლელი არსად მაქვს. ხომ შეიძლება მთავრობა დამეხმაროს და დაზიანებული ადგილები მაინც გადახურონ“, – ამბობს ნემსაძე.

მან დახმარების თხოვნით მერიას რამდენიმე თვის წინ მიმართა. თუმცა, მაშინ მერიის საზოგადოებასთან ურთიერთობის სამსახურში „სამხრეთის კარიბჭესთან“ განმარტეს, რომ შენობა ეკონომიკის სამინიტროს ბალანსზეა და მისი გადახურვის, ან შეკეთების უფლება არ აქვთ.

ეკონომიკის სამინისტროს სახელმწიფო ქონების ეროვნული სააგენტოში აცხადებენ, რომ სურვილის შემთხვევაში ახალციხის მერიას შეუძლია შენობის სარგებლობაში გადაცემის მოთხოვნით სააგენტოს მიმართოს: „ვინაიდან იქ მცხოვრები ქალნატონი არ იმყოფება შენობაში კანონიერად, ჩვენ სამართლებრივად არ გვაქვს უფლება გარემონტებაზე ნებართავა გავცეთ. ეს პრობლემა ადგილობრივმა თვითმმართველობამ უნდა მოაგვაროს. თუ მიზეზად იმას ასახელებენ, რომ ქონება ჩვენია, მოგვმართონ თხოვნით და აუცილბელად განვიხილავთ“.

ახალციხის მერის მოადგილის ზაზა გელაძის განმარტებით შენობის გადმოცემის მოთხოვნით ეკონომიკის სამინისტროში წერილს აუცილებლად გაგზავნიან, თუმცა, შეძლებენ თუ არა ყოფილი ტუბ–დისპანსერის შენობის გადახურვას, ან რეაბილიტაციას ჯერ უცნობია: „ვერაფერს გეტყვით. როცა გადმოგვცემენ ამაზე ამის მერე ვიფიქრებთ“.

მისი თქმით, შენობის გადმოცემის პროცესს რამდენიმე თვე სჭირდება. ამ დროის განმავლობაში კი ნანა ნემსაძეს ისევ წვიმისგან ჩამონგრეულ და დანესტიანებულ ოთახში მოუწევს ცხოვრება.



[თინათინ ზაზაძე, ახალციხე]